ជិត​៦ខែហើយ ដែល​រុស្ស៊ី​បង្ក​​​​​​សង្គ្រាមឈ្លាន​ពាន​​ទៅលើ​អ៊ុយក្រែន។​ នៅថ្ងៃព្រហស្បតិ៍​ ​លោកអគ្គលេខាធិការអ.ស.ប ត្រូវជួបជាមួយប្រធានាធិបតីអ៊ុយក្រែន និងប្រធានាធិបតីតួកគី  នៅ​ភាគ​ខាងលិច​ប្រទេស​អ៊ុយក្រែន ដើម្បីនឹង​ជជែកពិភាក្សា​គ្នា​អំពីការនាំចេញគ្រាប់ធញ្ញជាតិ និងសុវត្ថិភាពមជ្ឈមណ្ឌលនុយក្លេអ៊ែរ។ មជ្ឈមណ្ឌលនុយក្លេអ៊ែរ​របស់​អ៊ុយក្រែន ​នៅ ហ្សាប៉ូរីចា​ ដែល​ធំជាងគេ​នៅអឺរ៉ុប និងដែល​ឋិត​ក្រោម​ការ​ត្រួតត្រា​របស់​រុស្ស៊ីតាំងពីខែមីនាមក គឺកំពុងតែ​ត្រូវ​រង​ការ​គំរាម​កំហែង​ ព្រោះតែ​ការ​វាយ​ប្រហារដោយ​​គ្រាប់ផ្លោងនិងការ​ទម្លាក់​គ្រាប់បែក ហើយ​ប្រទេសទាំង​ពីរ​ទម្លាក់​កំហុស​ទៅលើគ្នាទៅវិញទៅមក​។ សំណុំ​រឿង​ដែន​ដី​គ្រីមេ ក៏ទំនង​ជៀស​មិនផុត​ដែល​ថ្នាក់ដឹកនាំ​ទាំងបី​ ត្រូវ​ពិភាក្សា​គ្នា​។​