ឧត្តមស្នងការដ្ឋាន​អង្គការសហប្រជាជាតិ​ទទួល​បន្ទុក​ជនភៀសខ្លួន​ហៅ​កាត់ UNHCR បាន​ប្រាប់​ឲ្យ​ដឹង​ក្នុង​ថ្ងៃ​ចន្ទ ទី២៣ ឧសភា​ថា ចំនួន​មនុស្ស​ដែល​បាន​បង្ខំ​ចិត្ត​រត់​គេច​ពី​សង្រ្គាម ពី​អំពើហិង្សា និង​ពី​ការ​រំលោភ​សិទ្ធិមនុស្ស​បាន​កើន​លើស ១០០លាននាក់​នៅ​ក្នុង​លោក។ កំណើន​លើស​នេះ​បាន​កើត​មាន​ឡើង តាំង​ពី​រុស្ស៊ី​បាន​ចូល​ឈ្លានពាន​អ៊ុយក្រែន​ក្នុង​ថ្ងៃទី២៤ កុម្ភៈ។ លោក​ហ្វីលីប៉ូ ហ្រ្កង់ឌី ឧត្តមស្នងការ​អង្គការសហប្រជាជាតិ​ទទួល​បន្ទុក​ជនភៀសខ្លួន​ព្រមាន​ថា តួលេខ​នេះ​ជា​ការ​ទាញ​សញ្ញា​អាសន្ន និង​ជា​ក្តីបារម្ភ​ដែល​ពិភពលោក​ត្រូវ​រួសរាន់​ទប់​ស្កាត់។