នៅក្នុងប្រទេសប្រេស៊ីល អតីតប្រធានាធិបតីលោក លូឡា បានជាប់ឆ្នោតប្រធានាធិបតីសាជាថ្មី​ នាការបោះឆ្នោតជុំទី២ ក្នុងថ្ងៃអាទិត្យ ទី៣០ តុលា​។ លោក លូឡា ទទួលបានសំឡេងឆ្នោតលើសប្រធានាធិបតីផុតអាណត្តិលោក បុលសូណារ៉ូ មិនដល់ ១% ផង។ ពោលគឺ ការ​រាប់សន្លឹក​ឆ្នោត​យប់​ថ្ងៃ​អាទិត្យ​ អតីតប្រមុខរដ្ឋ​លោក លូឡា បាន​សំឡេង ​៥០,៩% ទល់​នឹង​លោក បូលសូណារ៉ូ ប្រធានាធិបតី​ផុត​អាណត្តិ ដែល​បាន​សំឡេងឆ្នោត ៤៩,១%។ ​លោក លូឡា បាន​ប្រកាស​ជ័យ​ជម្នះ ទាំងដែល​លោក បូលសូណារ៉ូ រក្សាភាព​ស្ងៀមស្ងាត់​មកទល់​នឹង​ពេ​លនេះ។ តាមពិត លោក លូឡា មិនមែនជាអ្នក​នយោបាយថ្មីថ្មោង​ និងជា​មនុស្សដែលគ្រប់គ្នា​មិនស្គាល់ទេ។ តែអ្វីដែលគេ​​ស្ទើរតែ​មិនជឿគឺ​រូប​លោក ទើបតែ​ចេញពី​ពន្ធនាគារ និង​អាច​កែប្រែ​វាសនា​ជាប្រធានាធិបតី​ជាថ្មីម្តងទៀត​។