មួយ​សប្តាហ៍​មុន​ថ្ងៃ​បុណ្យ​ណូអែល និង​ជាង ១០ថ្ងៃ​មុន​ថ្ងៃ​ចូល​ឆ្នាំ​សកល មាន​ប្រទេស​កាន់​តែ​ច្រើន​បាន​ផ្តើម​អនុវត្ត​វិធានការ​តឹងរឹង​ជា​ថ្មី​ដើម្បី​ប្រឈម​ទប់​នឹង​ការ​ឆ្លង​រាលដាល​ដោយ « អូមីក្រុង »។ តាំង​ពី​បាន​លេច​រូបរាង​នៅ​អាហ្រ្វិកខាងត្បូង​ជិត ១ខែ មេរោគ​បំប្លែងខ្លួន​ថ្មី​មួយ​នេះ​បាន​និង​កំពុង​បន្ត​ឆ្លង​ចូល​ប្រទេស​កាន់​តែ​ច្រើន ពិសេស​នៅ​ក្នុង​ប្រទេស​អឺរ៉ុប។ លោក​មីខាអ៊ែល រ៉ៃយ៉ាន អ្នក​ទទួល​ខុស​ត្រូវ​ផ្នែក​ប្រតិបត្តិការ​សង្រ្គោះបន្ទាន់​របស់​អង្គការ​សុខភាព​ពិភពលោក​បាន​ទទួល​ស្គាល់​ថា វិបត្តិ​អាច​ធ្លាក់​ធ្ងន់ធ្ងរ​កាន់​តែ​ខ្លាំង​ដោយសារ​តែ​អូមីក្រុង​មាន​អត្រា​ឆ្លង​ខ្លាំង និង​ឆ្លង​លឿន។ តែ​លោក​រ៉ៃយ៉ាន​បាន​លើក​ឡើង​ពី​អនាគត​ប្រសើរ បើ​គ្រប់​គ្នា​រួម​គ្នា​ចាត់​វិធានការ និង​គ្រប់គ្រង​មេរោគ​ឲ្យ​បាន​ត្រឹមត្រូវ។