ប្រមុខរដ្ឋ និង​ប្រមុខរដ្ឋាភិបាល​នៃបណ្តាប្រទេស​សមាជិក​សហភាពអឺរ៉ុប​បាន​មូលមតិគ្នា​ជាធ្លុងមួយ កាលពីថ្ងៃ​ព្រហស្បតិ៍ទី ១៦ ធ្នូ ២០២១​ថា នឹង​រួមគ្នា​ជាមួយ​អាមេរិក​និង​អង់គ្លេស​ដើម្បី​ដាក់ទណ្ឌកម្ម​សេដ្ឋកិច្ច​បន្ថែម ប្រឆាំង​រុស្ស៊ី បើសិន​រុស្ស៊ី ចូលឈ្លានពាន​អ៊ុយក្រែន។ ភាពតានតឹង​នៅ​ព្រំដែន​រុស្ស៊ី អ៊ុយក្រែន នៅតែបន្ត​ចិញ្ចឹម​ក្តីបារម្ភ​របស់​សហភាពអឺរ៉ុប និង​អ៊ុយក្រែន ដែល​ថា រុស្ស៊ី​នឹង​អាច​លើកទ័ព ចូលឈ្លានពាន អ៊ុយក្រែន នៅប៉ុន្មានខែ​ខាងមុខ។ រុស្ស៊ី ដែលបាន​បដិសេធ​ថា គ្មាន​ចលនាទ័ព​នៅព្រំដែនជាមួយ​អ៊ុយក្រែន បានផ្តើមបេសកកម្ម​ការទូត​យ៉ាងសម្បើម នៅដើម​សប្តាហ៍នេះ ដើម្បីទាមទារ​ឲ្យ​អូតង់​ចុះកិច្ចសន្យា​តាមផ្លូវច្បាប់ ឈប់ពង្រីកដែន​ឥទ្ធិពល​ទៅក្នុង​បណ្តា​ប្រទេស​អតីត​សហភាពសូវៀត ដែល​នៅជាប់ព្រំដែន​រុស្ស៊ី ដែល​នៅក្នុង​នោះ មានផងដែរ​ប្រទេស​អ៊ុយក្រែន។