ក្រុងម៉ារីយូប៉ូល ស្ថិតនៅភាគអាគ្នេយ៍អ៊ុយក្រែន គឺជាទីក្រុង​ដែលមាន​ប្រជាជនអ៊ុយក្រែន និយាយភាសារុស្ស៊ី រស់នៅច្រើនបំផុត។ តែទីក្រុងនេះ បានក្លាយ​ជាសមរភូមិប្រយុទ្ធយ៉ាងស្វិតស្វាញ ពីសំណាក់កងកម្លាំងអ៊ុយក្រែន បើទោះបីជា​ត្រូវកងទ័ពរុស្ស៊ីឡោមព័ទ្ធជិតឈឹង អស់រយៈពេល​ជាង​២សប្តាហ៍មកហើយក្តី។ ក្រៅពីរងគ្រាប់បែក គ្រាប់មីស៊ីលយ៉ាងដំណំបំផុត ប្រជាជននៅទីក្រុងនេះ ត្រូវរស់នៅក្នុង​លក្ខខណ្ឌដ៏លំបាក ដោយការខ្វះស្បៀង និង​ថ្នាំសង្កូវ។ ក្រសួងការពារជាតិរុស្ស៊ី បានដាក់ឱសានវាទ ឲ្យ​អ៊ុយក្រែនត្រូវព្រមចុះចាញ់ នៅទីក្រុងម៉ារីយូប៉ូលនេះ​ ប្រសិនបើមិនចង់ឲ្យ​ស្លាប់​មនុស្សច្រើនជាងនេះទេ។ ការទាមទារ ដែលត្រូវបាន​ភាគីអ៊ុយក្រែនច្រានចោល​ភ្លាម ដោយ​ចោទថា ទោះយ៉ាងណា ក៏រុស្ស៊ីមិនគោរពការសន្យា​ ជួយ​ការពារជីវិតជនស្លូតត្រង់​អ៊ុយក្រែនដែរ។