សង្គ្រាមរុស្ស៊ី​ចូល​ឈ្លានពាន​​អ៊ុយក្រែន​​ មាន​រយៈពេល​ជាង​៩​ខែ​ហើយ។ រដូវ​រងារ​សីតុណ្ហភាព​ចាប់​ធ្លាក់​ត្រជាក់​ខ្លាំង​ហើយ ប្រជាពលរដ្ឋ​អ៊ុយក្រែនជា​ច្រើន​លាន​នាក់​កំពុង​រស់ដោយ​​គ្មាន​អគ្គីសនី​ប្រើប្រាស់ទៀត ព្រោះ​​រចនា​សម្ព័ន្ធ​ថាមពល​ត្រូវ​រង​ការ​បំផ្លាញ​ពី​សំណាក់​គ្រាប់​ផ្លោង​រុស្ស៊ី។ ស្ថានភាព​​នេះ បាន​ជំរុញ​ឱ្យ​​អ៊ុយក្រែន​កាន់​តែក្តុកក្តួលក្រៃក្នុង​ថ្ងៃ​​រំលឹក​ខួប​សោកនាដកម្ម​រងគ្រោះ​ទុរ្ភិក្ស​បង្ក​ឡើង​ដោយ​របប​ផ្តាច់ការ​ស្តាលីន នៃអតីត​សហភាព​សូវៀត។​ បើ​តាម​ប្រវត្តិវិទូ គ្រោះមហា​ទុរ្ភិក្ស​ដ៏​ធ្ងន់ធ្ងរក្នុង​ប្រវត្តិសាស្ត្រ​ពី​ឆ្នាំ​ ១៩៣២-១៩៣៣ បាន​ផ្តាច់​ជីវិតប្រជាជន​អ៊ុយក្រែន​ ១៥%​​។ ជា​ប្រវត្តិ​ដ៏​ជូរ​ចត់​ ដែល​អ៊ុយក្រែន​ចាត់​ទុក​ និង​ចង់​ឱ្យ​សហគមន៍អន្តរជាតិ​ទទួល​ស្គាល់ជា​អំពើ​ប្រល័យ​ពូជសាសន៍​​ ប៉ុន្តែមូស្គូ​អះអាង​ថា រុស្ស៊ី​ក៏​​ជា​ជន​​រងគ្រោះ​ដែរ។