បន្ទាប់ពីការប្រទះឃើញ នូវរណ្តៅកប់សពរួម និងសាកសពមនុស្សស្លាប់រាយប៉ាយ នៅ​ក្រុងប៊ូឆា ក្បែររដ្ឋធានីកៀវ កាលពីខែ​មេសា នៅពេលនេះ​អាជ្ញាធរអ៊ុយក្រែន ទើបតែបានប្រទះឃើញ​ផ្នូរសាកសព ចំនួន​យ៉ាង​ហោច​​៤៥០ទៀត នៅ​ក្នុ​ងព្រៃមួយកន្លែងក្បែរក្រុងអ៊ីហ្សយូម។ ក្រុងអ៊ីស្សយូម ដែល​ទើបតែត្រូវបាន​កងទ័ពអ៊ុយក្រែន​ រំដោះបានមកវិញ ពី​ដៃកងទ័ពរុស្ស៊ី កាលពីដើមសប្តាហ៍នេះ។ ភាគីអ៊ុយក្រែន បាន​លើកឡើងថា ផ្នូរសាកសពជាច្រើនរយនាក់ នៅ​ក្រុងអ៊ីហ្សយូមនេះ គឺជា​សក្ខីកម្ម​បញ្ជាក់ពីអំពើសាហាវព្រៃផ្សៃ ការកាប់សម្លាប់ របស់​កងទ័ពរុស្ស៊ី ហើយ​រុស្ស៊ីត្រូវតែទទួលខុសត្រូវចំពោះមុខច្បាប់។