ដំណើរការចរចា​សន្តិភាព​រវាង​អ៊ុយក្រែន និង​រុស្ស៊ី​បាន​ឈាន​ចូលដល់​ថ្ងៃទី២ នៅ​ទីក្រុង​អ៊ីស្តង់ប៊ូល ប្រទេស​តួកគី។ នៅថ្ងៃអង្គារទី​២៩ មីនា ប្រធានាធិបតី តួកគី លោក​រេស៊េប អ៊ែរដូហ្កានដែលជាអ្នកសម្របសម្រួល​ការចរចា​ររវាង​រុស្ស៊ី និងអ៊ុយក្រែន​បាននិយាយ​ថា ភាគី​ទាំងពីរ​សុទ្ធតែ​មាន​កង្វល់​ត្រឹមត្រូវរៀងៗខ្លួន។ នៅពេល​សង្រ្គាមឈ្លានពាន​អ៊ុយក្រែន​អូសបន្លាយ៣៧ថ្ងៃមកហើយ ចំនុចសំខាន់​នៃការចរចា រុស្ស៊ី អ៊ុយក្រែនផ្តោត​ចំបង​ទៅលើ​ការធានាសន្តិសុខសម្រាប់​អ៊ុយក្រែន ជាថ្នូរ​នឹងអព្យាក្រឹត្យភាព​របស់​អ៊ុយក្រែន។ កាលពី​ថ្ងៃ​អាទិត្យ ប្រធានាធិបតី​អ៊ុយក្រែន លោក​ហ្សេឡេនស្គី បាន​និយាយ​ថា ភាគីអ៊ុយក្រែន​កំពុងពិចារណា​ស៊ីជម្រៅស្តីពីការទាមទារ​របស់​រុស្ស៊ី ស្តីពីអព្យាក្រឹត្យភាពរបស់អ៊ុយក្រែន។