ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរ​ជាតិ​នៅ​យប់​នេះ គឺ​លោក​បណ្ឌិត ​លី សុខ​ឃាង​ ជា​នាយក​មជ្ឈ​មណ្ឌល​សន្តិភាព​អន្លង់វែង​ ដែល​ជា​គម្រោង​មួយ​របស់​មជ្ឈ​មណ្ឌល​ឯក​សារ​កម្ពុជា ​(DC-CAM)។ នៅ​ពេល​ខាង​មុខ​នេះ​ លោក​បណ្ឌិត​ លី ​សុខឃាង នឹងបោះ​ពុម្ព​ផ្សាយ​ឯក​សារ​ស្រាវ​ជ្រាវ​របស់​លោក​មួយ ដែល​ក្នុង​នោះ​ក៏​បាន​លើក​ឡើង​ពី​ផែន​ការក៥​ដែរ​ ខណៈ​ពេល​​​ថ្មីៗ នេះ ​មាន​ការ​លើក​ឡើង​ផ្សេង​ៗ​គ្នា ​ចំពោះ​ផែន​ការ​ក៥ ពី​ភាគី​រដ្ឋាភិ​បាល និង​គណ​បក្សប្រឆាំង​នៅ​កម្ពុជា​។ ក្នុងនាទីភ្ញៀវប្រចាំថ្ងៃ លោក ​លី សុខ​ឃាង ​​បាន​លើក​ឡើង​ ពី​ផល​វិជ្ជមាន និង​អវជ្ជ​មាន​របស់​ផែន​ការ​នេះ។ លោកបណ្ឌិត សុខ​ឃាង​ក៏​បាន​ដក​ស្រង់​ការ​លើក​ឡើង​របស់​អតីត​ទាហា​ខ្មែរ​ក្រហម​ម្នាក់​​ថា ផែន​ការ​ក៥ ធ្វើ​ឲ្យ​ទាហាន​ខ្មែរ​ក្រហមមួយ​ចំនួន​​ជ្រៀត​ចូល​មក​​ក្នុង​ប្រទេស​វិញ​។

នៅខេត្ត​កំពត​ ថ្ងៃអាទិត្យ​នេះ​ ក្រុម​អ្នក​គាំទ្រ​បក្សគណ​បក្ស​សម្ព័ន្ធ​ដើម្បី​ប្រជាធិតេយ្យ ឬ LDP ច្រើន​ជាង​ ៨ រយនាក់ បាន​​ធ្វើ​បាតុកម្មអ​ហិង្សា ​តវ៉ា​ឲ្យ​ដោះលែង​មនុស្ស ​ចំនួន​១៣នាក់ ដែល​ជា​ សមា​ជិក​​គាំទ្រ​បក្ស ​LDP  និង​ដែល​​ត្រូវ​អាជ្ញា​ធរ​ចាប់​ខ្លួន ​ពីម្សិលមិញ​។  

ក្នុង​នាម​ជា​ភ្ញៀវ​ប្រចាំថ្ងៃ​របស់​វិទ្យុបារាំង​ RFI ​នៅ​យប់​នេះ ​លោក ខឹម វាសនា ដែល​ជា​ប្រធាន​បក្ស LDP ​ក៏​​យល់មិន​ច្បាស់​ថា រឿង​នេះ ​គឺជា​រឿង​ទំនាស់​ដីធ្លីធម្មតា ឬ​ជា​រឿង​នយោបាយ​ដែលរដ្ឋ​អំណាច​​ដាក់​សម្ពាធ​ទៅ​​លើក​អ្នក​គាំទ្ររបស់​លោក​​នោះទេ។ ក៏ប៉ុន្តែ ​ប្រធាន​បក្សរូប​នេះ ថា​លោក​នឹង​ប្រើ​គ្រប់​មធ្យោបាយ​ ដើម្បី​ឲ្យ​មាន​ការ​ដោះលែង​ជន​ទាំង​១៣​នាក់​នោះ។

បើ​តាម​លោក ខឹម វាសនា, ការ​ចាប់​ខ្លួន​ពួក​គេ​ទាំង​១៣នាក់​នោះ គឺ​ខុស​ច្បាប់ ព្រោះគ្មាន​ដីកា​ចាប់​ខ្លួន​នោះទេ។​

 

យ៉ាង​ណា​ក៏ដោយ លោក ខឹម វាសនា ក៏​ដឹង​ខ្លួន​ឯង​ដែរថា ការ​តតាំង​ដោយ​ស្មើ​ភាព​គ្នា​ចំពោះ​មុខ​ច្បាប់ គឺ​មិន​អាច​រក​ខុស​រក​ត្រូវ​បាន​ទេ ព្រោះ​​សង្គម​ខ្មែរ គឺ​​មាន​អំណាច​ប្រមូល​ផ្តុំ។ ទោះ​យ៉ាងណា​ក្តី លោកថា បើ​សិន​ជា​មានការ​ចង់​រក​ភាពត្រឹមត្រូវ ពិត​មែន គឺ​រដ្ឋ​គួរតែមាន​គណៈកម្មការ​ឯករាជ្យ​ចុះ​ទៅពិនិត្យ​ដោយ​ផ្ទាល់​ គឺនឹង​ដឹង​ច្បាស់​ហើយ។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរ​ជាតិ​នៅ​យប់​នេះ គឺ​លោក​ វ៉ី សំណាង អភិបាល​ខេត្ត​កំពង់ស្ពឺ។ ក្នុង​ខែ​ឧសភា ឆ្នាំ២០១៧ ខាង​មុខ​នេះ ខេត្ត​កំពង់ស្ពឺ​នឹង​ដាក់​ឲ្យ​ដំណើរ​ការ​សេវា​រថយន្ត​ក្រុង​សាធារណៈ​ចំនួន​២០គ្រឿង ដើម្បី​កាត់​បន្ថយ​ការ​ចំណាយ​របស់​ប្រជា​ពល​រដ្ឋ​លើ​ថ្លៃ​ធ្វើ​ដំណើរ​ និងរួម​ចំណែក​កាត់​បន្ថយ​គ្រោះ​ថ្នាក់​ចរាចរណ៍។ នេះ​បើ​តាម​លោកវ៉ី សំណាង។ ​លោក​ក៏​ចង់​ឲ្យ​ខេត្ត​ផ្សេង​ទៀត​នៅ​ទូទាំង​ប្រទេស​កម្ពុជា​មាន​សេវា​រថយន្ត​ក្រុង​នេះ​ដូច​ខេត្ត​កំពង់ស្ពឺដែរ​ ព្រោះ​ពលរដ្ឋ​ចំណាយ​លុយ​តិច​ក្នុង​ការ​ធ្វើ​ដំណើរ ហើយ​ធ្វើ​ដំណើរ​បានលឿន​ និង​កាត់​បន្ថយ​គ្រោះ​ថ្នាក់​ចរាចរណ៍​។

ភ្ញៀវ​ប្រចាំ​ថ្ងៃ​របស់​យើង​នៅ​យប់​នេះ គឺ​បណ្ឌិត​ ឈាង វណ្ណារិទ្ធិ ដែល​​ជា​ប្រធាន​វិទ្យា​ស្ថាន​កម្ពុជា​សម្រាប់ការសិក្សាយុទ្ធសាស្ត្រ។ ក្នុង​នាម​ជា​អ្នក​ជំនាញ​​សិក្សា​ស្រាវ​ជ្រាវ​តំបន់អាស៊ី បណ្ឌិត​ ឈាង វណ្ណារិទ្ធិ មើល​ឃើញថា ភូមានៅ​មាន​បញ្ហា​ប្រឈម​ស្មុគស្មាញ​ច្រើន តែ​កំណែ​ទម្រង់​រយៈពេល​ខ្លី​នៅ​ភូមា​ បាន​ទទួល​ផល​ច្រើន​ និង​លឿន​ជាង​កម្ពុជា។ ប្រទេស​ទាំង​ពីរ​ត្រូវ​មាន​រឿង​ច្រើន​ដែល​ត្រូវ​រៀន​​សូត្រ​ពី​គ្នា​ទៅ​វិញ​ទៅ​មក។ ចំពោះ​លោកបណ្ឌិត​រូបនេះ បទ​ពិសោធ​​​នៃការ​ផ្ទេរ​អំណាច​ដោយ​រលូន​នៅ​ភូមា ក៏​កម្ពុជាគួរ​តែ​គិត​គូរ​និង​រៀប​ចំយន្ត​ការ​ទុក​ឲ្យ​ហើយ​ដែរ ដើម្បី​ឲ្យ​សង្គម​កម្ពុជា​អាច​រស់​នៅ​ដោយ​សុខ​ដុម​​ នៅថ្ងៃខាង​មុខ​។

គណបក្ស​មហាសាមគ្គី​ជាតិ​ខ្មែរ និង គណបក្ស​យុវជន​កម្ពុជា បាន​ចែក​ផ្លូវ​គ្នា​ដើរ​រៀង​ៗ​ខ្លួន​វិញ​ហើយ បន្ទាប់​ពី​រួបរួម​គ្នា​បាន​មិន​ដល់​មួយ​សប្ដាហ៍​ផង​។ អ៊ឹម រចនា បាន​សម្ភាស​លោក ញ៉ែម វណ្ណថន ប្រធាន​គណបក្ស​មហាសាមគ្គី​ជាតិ​ខ្មែរ និង​លោក ពេជ្រ ស្រស់ ប្រធាន​បក្ស​យុវជន​កម្ពុជា តាម​ទូរសព្ទ អំពី​ហេតុផល​ដែល​ធ្វើ​ឲ្យ​កិច្ច​ព្រម​ព្រៀង​រួបរួម​គ្នា​ទទួល​បរាជ័យ​។

ភ្ញៀវ​ប្រចាំ​ថ្ងៃ​របស់​វិទ្យុ​បារាំ​ងអន្តរ​ជាតិ ​នៅ​យប់​នេះ ​គឺ​លោក ​ ផៃ ប៊ុន​លាង ជា​តំណាង​បណ្តាញ​សហគមន៍​ព្រៃ​ឡង់។ បណ្តាញ​សហគមន៍​ព្រៃ​ឡង់​ កាល​ពី​ថ្ងៃទី​២៩ ខែ​មករា បាន​ទទួល​ពាន​រង្វាន់ "កិច្ច​សហការ​អន្តរ​ជាតិ​អ្នក​ការពារព្រៃ​ឈើ​តំបន់​ត្រូ​ពិច" ឆ្នាំ២០១៧  និង​ទឹក​ប្រាក់​៣ពាន់​ដុល្លារ​អាមេរិក របស់​សាកល​វិទ្យាល័យ​យែល (Yale University) នៅ​សហរដ្ឋ​អាមេរិក។ លោក​ផៃ ប៊ុន​លាង ជា​តំណាង​បណ្តាញ​សហគមន៍​ព្រៃ​ឡង់ ដែល​ទៅទទួល​យក​ពាន​រង្វាន់​នេះ បាន​ចាត់​ទុក​ពាន​រង្វាន់​នេះថា គឺ​ជា​ការ​ទទួល​ស្គាល់​ពី​សហគមន៍​អន្តរ​ជាតិ​ចំពោះ​កិច្ចការ​ពារ​ព្រៃ​ឡង់ ​ដោយ​ស្ម័គ្រ​ចិត្ត។ លោក​បញ្ជាក់​ថា​បើ​ទោះ​បី​ជា​ពេល​ខាង​មុខ​បណ្តាញ​សហគមន៍​ព្រៃឡង់​មិនបាន​ទទួល​ថវិកា​ឧបត្ថម្ភ ក៏​ក្រុម​របស់​លោក​នៅ​តែ​បន្ត​សកម្ម​ភាព​ការពារ​ព្រៃ​ឈើ​ដដែល​៕

នៅ​ថ្ងៃ​អង្គារ​នេះ ​មេ​ដឹកនាំ​គណបក្ស​ប្រជាជន​កម្ពុជា ​និង​មេ​ដឹកនាំ​គណបក្ស​សង្គ្រោះ​ជាតិ ​បាន​ផ្ញើ​សារ​ធ្ងន់​ៗ​ ដាក់​គ្នា​ទៅវិញ​ទៅមក ​ដែល​ទំនង​ជា​រុញ​ស្ថានការណ៍​នយោបាយ ​ឲ្យ​ឡើង​កំដៅ​បន្ថែម​ទៀត​ខណៈ​ដែល​ការ​បោះឆ្នោត​ក្រុម​ប្រឹក្សា​ឃុំ ​សង្កាត់ ​កាន់តែ​ខិត​ជិត​មក​ដល់​។ ​លោក​បណ្ឌិត ​ចាន់ វិបុល ​សាស្ត្រាចារ្យ​វិទ្យាសាស្ត្រ​នយោបាយ ​បាន​មើល​ឃើញ​ថា ច​រិ​ក​នយោបាយ​របស់​គណបក្ស​ដែល​មាន​អាសនៈ​នៅ​ក្នុង​រដ្ឋសភា​ទាំងពីរ ​ដែល​មិន​បាន​បង្ហាញ​ពី​ឯកភាព​ជាតិ​ដូច្នេះ​ បង្ក​ឲ្យ​មាន​ការ​ព្រួយ​បារម្ភ​សម្រាប់​ប្រទេស​ជាតិ​និង​ប្រជាជន ​និង​អាច​ជះ​ឥទ្ធិពល​មិន​ល្អ​ដល់​ការ​បោះឆ្នោត​សំខាន់​ៗ​ខាងមុខ​ផង​ដែរ​។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​នា​រាត្រី​នេះ​គឺ​ លោក​ ចាន់ តារា អគ្គនាយក​ដឹក​ជញ្ជូន​នៃ​ ក្រសួង​សាធារណៈការ​ និង​ដឹក​ជញ្ជូន។ ចាប់​ពី​ថ្ងៃ​ចន្ទ ទី​៣០ មករា នេះ​ត​ទៅ​ ហាង​លក់​ម៉ូតូរបស់​ភ្នាក់​ងារ​ក្រសួង​សាធារណៈការ និង​ដឹក​ជញ្ជូន ត្រឹម​រយៈ​ពេល​ខ្លី​ចន្លោះ​ពី​ ១០នាទី ទៅ ១៥​នាទី អាច​ចាប់​ផ្លាក​លេខ និង​ព្រីន​កាត​គ្រី​ម៉ូតូ ជូន​អតិថិជន​បាន​ហើយ បន្ទាប់​ពី​បំពេញ​ឈ្មោះ​ដើម្បី​រង​ចាំ​ការ​អនុញ្ញាត​ពី​ក្រសួង​តាម​អនឡាញ​ប៉ុណ្ណោះ។ ក្រៅ​ពី​ផ្តល់​ភាព​ងាយ​ស្រួល​ដល់​ម្ចាស់​ម៉ូតូ និង​រថយន្ត​ដើម្បី​ទទួល​បាន​បណ្ណ​សម្គាល់​យាន​ជំនិះ​ ក្រសួងសាធារណៈការ​ និង​ដឹក​ជញ្ជូន​ ក៏​បាន​បើក​ដំណើរ​ការ​ប្រព័ន្ធ​ស្វ័យ​ប្រវត្តិកម្ម​ មុខ​ងារ​ផ្សេង​ទៀត សម្រាប់​ ការ​ត្រួត​ពិនិត្យ​លក្ខណៈ​បច្ចេកទេស​យាន​ជំនិះ​ ការ​ផ្តល់​បណ្ណ​បើក​បរ​យាន​យន្ត​ និង​កម្មវិធី​យល់​ដឹង​អំពី​ទ្រឹស្តី​នៃ​ការ​បើក​បរ​លើ​ទូរសព្ទ​ដៃ​ ផង​ដែរ។ លោក ចាន់ តារា សង្ឃឹម​ថា ប្រព័ន្ធ​ស្វ័យ​ប្រវត្តិកម្ម​ថ្មី​នេះ នឹង​ចូល​រួម​កាត់​បន្ថយ​អំពើ​ពុក​រលួយ​ និង​លុប​បំបាត់​ការ​យក​ថ្លៃ​សេវា​បន្ថែម​ក្រៅ​ផ្លូវ​ការ​ពី​សេវា​រដ្ឋបាល​សាធារណៈ​ទាំង​ស្រុង។

ភ្ញៀវ​ប្រចាំថ្ងៃ​របស់​វិទ្យុ​បារាំង​នៅរាត្រីនេះ គឺ​លោក លី សែ ដែលជា​នាយកប្រតិបត្តិ​​គ្រឹះ​ស្ថាន​អង្គរ ដែល​ជា​ស្ថាប័ន​ទទួល​បន្ទុក​ចាត់​ចែង​ការ​លក់​សំបុត្រ​ចូល​ទស្សនា​រមណីយ​ដ្ឋាន​តំបន់​អង្គរ​​។ ដូច​លោកអ្ន​កស្តាប់​ជ្រាប​ស្រាប់ហើយថា​ ចាប់ពីថ្ងៃ​ទី​១ ដើមខែ​កុម្ភៈ​ខាង​មុខនេះ​ តម្លៃ​ចូល​​​ទស្សនា​រមណីយ​ដ្ឋាន​ក្នុង​តំបន់​អង្គរ គឺនឹង​ត្រូវ​ឡើង​ថ្លៃ ស្ទើរតែ​គុណ​នឹង​ពីរ។ ចំនួន​នេះ គឺត្រូវ​លោក លី សែ អះអាង​ថា​មិន​ថ្លៃពេក​ទេ។

 

នាយកប្រតិបត្តិ​​គ្រឹះស្ថានអង្គរ បាន​ប្រាប់​វិទ្យុ​បារាំង​ RFI បន្ថែមថា អាជ្ញាធរ​ពាក់ព័ន្ធ​នឹង​ពង្រឹងគុណភាព​សេវា​ដើម្បី​បង្កើន​ភាព​ងាយ​ស្រួល​ដល់ភ្ញៀវ​ទេសចរ។ ក្នុង​នោះ គឺនៅ​​ឆ្នាំក្រោយ ភ្ញៀវ​ទេសចរ​បរទេស នឹង​អាច​ទិញ​សំបុត្រ​តាមរយៈ​អ៊ិនធឺណិត​ ក៏បាន​ដែរ។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរ​ជាតិ នៅ​រាត្រី​នេះ ​គឺ​លោក​ ច័ន្ទ ​សុផល ជា​នាយក​មជ្ឈ​មណ្ឌល​សិក្សា​គោល​នយោបាយ និង​ជា​អ្នក​វិភាគ​សេដ្ឋ​កិច្ច​។ ក្នុង​ឱកាស​​​ចូល​ឆ្នាំ​ចិន-វៀតណាម មាន​ការ​លើក​ឡើង​ថា​ការ​ចំណាយ​របស់​ប្រជា​ពលរដ្ឋ​ខ្មែរ​សែស្រឡាយ​​ចិន​មាន​ការកើន​ឡើង​ច្រើន​ជាង​ឆ្នាំ​មុន​។ ជុំវិញការ​លើក​ឡើង​នេះលោក​ច័ន្ទ សុផល​បាន​ឲ្យ​ដឹង​ថា​​ការ​ចំណាយ​ច្រើនក្នុង​ឱកាស​​​ចូល​ឆ្នាំ​ចិន ដោយ​សារ​ការ​រីក​ចម្រើន​របស់​ពល​រដ្ឋ​នៅ​តាម​ទីក្រុង ជា​ពិសេសកូន​ចៅចិ​ន ដែលភាគ​ច្រើន​ជា​ពាណិជ្ជករ ហើយ​ការ​កើន​ឡើង​ចំនួន​ពលរដ្ឋ​ក៏​ជា​មូល​ហេតុ​មួយដែរ​។