គណៈ​កម្មការ​អឺរ៉ុប​នៅ​ថ្ងៃទី១២​ខែកុម្ភៈ​នេះ បាន​សម្រេច ប្រកាស​ព្យួរ ផ្នែក​មួយ​ចំនួន​នៃ​ប្រព័ន្ធ​អនុ​គ្រោះ​ពន្ធ EBA ដល់​កម្ពុជា ក្នុង​នោះ​មាន​វិស័យ​វាយន​ភណ្ឌ​កាត់​ដេរ​និង​ដេរ​ស្បែក​ជើង ដែល​ជា​វិស័យ​មួយ​សំខាន់​ក្នុង​ការ​ទ្រទ្រង់​សេដ្ឋកិច្ច​របស់​ប្រទេស​កម្ពុជា​ផង​ដែរ​។ លោក អាត់ ធន់ ប្រធាន​សហ​ភាព​ការងារ​កម្ពុជា​ថ្លែង​ថា វិស័យ​កាត់​ដេរ​អាច​នឹង​បាត់​បង់​ការងារ​កម្មករ​ប្រមាណ​ពី១ម៉ឺន​ទៅ២ម៉ឺន​នាក់ ប្រសិន​បើ​មាន​ការ​កាត់​ពន្ធ​អនុ​គ្រោះ​ពី​អឺរ៉ុប​ក្នុង​រង្វង់​២០%​។ ខណៈ​ដែល​មិន​ទាន់​មាន​ប្រតិកម្ម​ពី​រដ្ឋា​ភិបាល​យ៉ាង​ណា​នៅ​ឡើយ​នោះ លោក អាត់ ធន់ បញ្ជាក់​ថា​ស្ថាន​ភាព​អាច​ប្រសើរ​ឬ​យ៉ាង​ណា​នោះ គឺ​អាស្រ័យ​ទៅ​លើ​ប្រតិកម្ម​របស់​រដ្ឋា​ភិបាល​កម្ពុជា​។

អង្គការសង្គម​ស៊ីវិល​នៅកម្ពុជា​ចំនួន​១០០​ស្ថាប័ន​ បាន​ចេញ​សេចក្តី​ថ្លែង​ការណ៍មួយ​ម្សិលមិញ​ដោយ​ទទួចឲ្យ​រដ្ឋាភិបាល​ធ្វើ​និរាករណ៍ចោល ច្បាប់​ស្តី​ពី​សមាគម និង​អង្គការ​មិន​មែន​រដ្ឋាភិបាល បន្ទាប់​ពី​ជួបប្រជុំគ្នាលើក​៤​កន្លងមក​នៅតែ​មិនទាន់ឯកភាពគ្នា។ ប៉ុន្តែ​លោក ប៊ុន ហុន រដ្ឋលេខាធិការ​ក្រសួង​មហាផ្ទៃ​ទទួល​បន្ទុកកិច្ចការនេះ ច្រានចោល​ការលើក​ឡើងនេះ ហើយថា​ក្រសួង​មហាផ្ទៃ ​នៅតែ​បន្ត​ពិភាក្សាជាមួយ​អង្គការ​មិនមែន​រដ្ឋាភិបាល​តទៅទៀត ដោយ​មិនផ្អាក​ចោលឡើយ។

ភ្ញៀវ​ប្រចាំ​ថ្ងៃ​របស់​យើង​នៅ​រាត្រី​នេះ គឺ​លោក សៀង ថៃ ដែល​ជា​អ្នក​នាំ​ពាក្យ​ក្រសួង​ពាណិជ្ជ​កម្ម​កម្ពុជា​។ ឆ្លើយ​តប​នឹង​សំណួរ​របស់​វណ្ណ សុគន្ធា ជុំវិញ​បញ្ហា​កង្វះ​វត្ថុ​ធាតុ​ដើម​ពី​ប្រទេស​ចិន លោក សៀង ថៃ បាន​គូស​បញ្ជាក់​ថា ដំណោះ​ស្រាយ​ដែល​ល្អ គឺ​ម្ចាស់​រោង​ចក្រ​នានា​គួរ​បញ្ជា​ទិញ​វត្ថុ​ធាតុ​ដើម​នេះ​ពី​ប្រទេស​ផ្សេងៗ​មួយ​រយៈ​សិន​រហូត​បញ្ហា​មេរោគ​ឆ្លង​កូរ៉ូណា​អាច​ដោះ​ស្រាយ​បាន​។

បុរស​ជនជាតិ​ចិន​ដែល​កម្ពុជា​អះអាង​ថា ​មាន​ផ្ទុក​មេរោគ​កូរ៉ូណាទី​១​នៅ​កម្ពុជា​ នឹង​អនុញ្ញាត​ឲ្យ​ចាក​ចេញ​ពី​មន្ទីរ​ពេទ្យ​ខេត្ត​ព្រះសីហនុ ​នៅ​ថ្ងៃទី ​១០​ កុម្ភៈ ​ស្អែក​នេះ ​បន្ទាប់​​​ពី​​ព្យាបាល​​ជា​សះស្បើយ​​។​ លោក​ស្រី​វេជ្ជបណ្ឌិត ​ឱ ​វណ្ណឌីន ​រដ្ឋលេខាធិការ​និង​ជា​អ្នក​នាំ​ពាក្យ​ក្រសួង​សុខាភិបាល​កម្ពុជា ​ដែល​ជា​ភ្ញៀវ​ប្រចាំថ្ងៃ​របស់​យើង​នៅ​រាត្រី​នេះ​​ បាន​គូស​បញ្ជាក់​ថា ​​លោក​ ​ចា ​ជិនហូរ ​​អាយុ​​៦០​​ឆ្នាំ ​​នឹង​ត្រូវ​អនុញ្ញាត​ឲ្យ​ចាក​ចេញ​ពី​មន្ទីរពេទ្យ​នៅ​ថ្ងៃ​ស្អែក​នេះ ​ប្រសិន​បើ​លទ្ធផល​ធ្វើតេស្ត​ចុង​ក្រោយ​អវិជ្ជមាន​។ ​លោក​រដ្ឋមន្ត្រី​សុខាភិបាល​ ម៉ម​ ប៊ុនហេង​ រួម​ជា​មួយ​លោក​ស្រី​ផង ​នឹង​ធ្វើ​ដំណើរ​ទៅ​កាន់​ខេត្ត​ព្រះសីហនុ​ដោយផ្ទាល់​នៅ​ថ្ងៃ​ស្អែក​នេះ​ ដើម្បី​ជួប​ជា​មួយ​បុរស​ជនជាតិ​ចិន​ខាង​លើ​នេះ ​មុន​នឹង​អនុញ្ញាត​ឲ្យ​ចាក​ចេញ​ពី​មន្ទីរពេទ្យ​ ​និង​ឲ្យ​ប្រាកដ​ថា ​បុរស​ជនជាតិ​ចិន​រូប​នេះ ​ពិត​ជា​ជា​សះ​ស្បើយ​១០០​ភាគ​រយ​។

នៅ​សល់​តែ​៤​ថ្ងៃ​ទៀត​ប៉ុណ្ណោះ ​ពោល​គឺ​នៅ​ថ្ងៃទី ​១២​ កុម្ភៈ ​ដើម​សប្តាហ៍​ក្រោយ​នេះ ​គណៈ​កម្មការ​អឺរ៉ុប​នឹង​ធ្វើ​សេចក្តី​សម្រេច​ចិត្ត​ចុង​ក្រោយ​ ថា​តើ ​ត្រូវ​បន្ត​ឬ​ក៏​ត្រូវ​ព្យួរ​ប្រព័ន្ធ​អនុគ្រោះពន្ធ ​EBA​ ពី​កម្ពុជា ​ឬ​ក៏​ត្រូវ​ព្យួរ​ផ្នែក​ខ្លះ​។ ​បើ​តាម​ដំណឹង​ក្រៅ​ផ្លូវ​ការ ​អឺរ៉ុប​នឹង​កាត់​ផ្នែក​ខ្លះ ​ហើយ​រក្សា​ទុក​ផ្នែក​ខ្លះ​​ ដោយ​មិន​កាត់​ទាំង​អស់​នោះ​ទេ​។​ ​ទោះ​បី​ជា​ដំណឹង​នេះ​មិន​ទាន់​ផ្លូវ​ការ​ក្តី ​តែ ​លោក ​អាត់ ​ធន់ ​ប្រធាន​សហភាព​ការងារ​កម្ពុជា ​ដែល​ជា​ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរជាតិ ​RFI ​នៅ​រាត្រី​នេះ ​បាន​លើក​ឡើង​ថា ​ទោះ​បី​ជា​អឺរ៉ុប​កាត់​ផ្នែក​ខ្លះ ​ហើយ​រក្សា​ផ្នែក​ខ្លះ​ក៏​ដោយ ​ក៏​វា​នឹង​ជះ​ឥទ្ធិពល​ ឬ​ផល​ប៉ះ​ពាល់​ដល់​សេដ្ឋកិច្ច​របស់​កម្ពុជា​ដែរ ​ដ្បិត​កម្ពុជា​ត្រូវ​ការ​ទីផ្សារ​អឺរ៉ុប ​ដើម្បី​នាំ​ចេញ​ផលិត​ផល​របស់​ខ្លួន​ ក្នុង​ឋានៈ​ជា​ប្រទេស​ដែល​ទទួល​បាន​ការ​អនុគ្រោះ​ពន្ធ​។ ​យ៉ាង​ណា​ក្តី ​នៅ​នាទី​ចុង​ក្រោយ​នេះ ​លោក​ អាត់ ​ធន់ ​បាន​អំពាវនាវ​ឲ្យ​អ្នក​នយោបាយ​ខ្មែ​រ​ចូល​តុចរចា​ដើម្បី​ស្វែង​រក​ដំណោះ​ស្រាយ​នយោបាយ​សមស្រប​មួយ​​ ដើម្បី​រក្សា​បាននូវ​ប្រព័ន្ធ​អនុគ្រោះ​ពន្ធ ​EBA ​នេះ​៕

ភ្ញៀវ​ប្រចាំថ្ងៃ​របស់​យើង​នៅ​រាត្រី​នេះ គឺ​លោក ឃាង ភារម្យ អ្នក​នាំ​ពាក្យ​សាលា​ខេត្ត​ព្រះ​សីហនុ។ ជុំវិញស្ថានភាព និង​បញ្ហា​ទេស​ចរណ៍​នៅ​ក្នុង​ខេត្ត​ព្រះ​សីហនុ លោក ឃាង ភារម្យ បាន​គូស​បញ្ជាក់​ថា នៅ​ពេល​នេះ អា​ជ្ញា​ធរ​ខេត្ត​កំពុង​តែ​កែ​លម្អ និង​រៀប​ចំ​ឱ្យ​បាន​ស្អាត​ល្អ​ឡើង​វិញ​នូវ​កន្លែង​កម្សាន្ត​នានា​នៅ​ក្នុង​ខេត្ត​ព្រះ​សីហនុ ដើម្បី​ទាក់​ទាញ​ភ្ញៀវ​ទេសចរ​ទាំង​ជាតិ និង​អន្តរ​ជាតិ​ឱ្យ​ធ្វើ​ដំណើរ​ទៅ​កាន់​ទីនោះ​បាន​ច្រើន​ដូច​ពេល​មុនៗ​។

សវនា​ការ​សប្តាហ៍​ទី៤ លើ​សំណុំ​រឿង សន្ទិដ្ឋិ​ភាព​របស់​លោក កឹម សុខា ប្រធាន​អតីត​គណ​បក្ស​សង្គ្រោះ​ជាតិ បាន​បញ្ចប់​ហើយ​នៅ​ព្រឹក​ថ្ងៃ​ព្រហស្បតិ៍​នេះ ដោយ​ការ​សួរ​ដេញ​ដោល និង​ដាក់​ភស្តុ​តាង​ចំនួន​២វគ្គ ចាប់​ពី​ឆ្នាំ១៩៩៣ ដល់​ឆ្នាំ​២០០៧ និង​ពី​ឆ្នាំ​២០០៧​ដល់​ឆ្នាំ​២០១២ ត្រូវ​បាន​បញ្ចប់​។ សវនាការ​លើ​សំណុំ​រឿង​លោក កឹម សុខា នេះ នឹង​ត្រូវ​បន្ត​ទៅ​ថ្ងៃ​ពុធ និងថ្ងៃព្រហស្បតិ៍​សប្តាហ៍​ក្រោយ​ទៀត ដោយ​នឹង​មាន​ការ​ជជែក​គ្នា​ចាប់​ពី​ឆ្នាំ​២០១៣ រហូត​ដល់​ពេល​ការ​ចាប់​ខ្លួន​លោក កឹម សុខា។ បន្ទាប់​ពី​បញ្ចប់​សវនា​ការ​រយៈ​ពេល​១ថ្ងៃ​កន្លះ មក​នេះ លោក​ស្រី ម៉េង សុភារី មេធាវី​ការពារ​សិទ្ធិ​លោក កឹម សុខា និងលោក លី ច័ន្ទតុលា មេធាវី​របស់​រដ្ឋា​ភិបាល បាន​ផ្តល់​បទ​សម្ភាស​ខ្លី​ដល់​វិទ្យុ​បារាំង RFI ដែល​ធ្វើ​ការ​សាក​សួរ​ដោយ ញឹម សុផល ដូចតទៅ​៖

វិទ្យា​ស្ថាន​ចក្ខុ​វិស័យ​អាស៊ី​(AVI) នៅ​ថ្ងៃ​ពុធ​នេះ បាន​ធ្វើ​ពិធី​ចុះ​ហត្ថ​លេខា​លើ​អនុស្សរណៈ​យោគ​យល់​គ្នា ជាមួយ​នឹង​តំណាង​ព្រឹទ្ធ​សភា​កម្ពុជា និង​សម្ព័ន្ធ​អង្គ​ការ​សង្គម​ស៊ីវិល​នៃ​ទីស្តី​ការ​គណៈ​រដ្ឋ​មន្ត្រី​ផង​ដែរ ដើម្បី​ពង្រឹង​កិច្ច​សហ​ប្រតិបត្តិ​ការ​ស្រាវ​ជ្រាវ និង​ធ្វើ​ការ​បណ្តុះ​បណ្តាល​ផ្សេងៗ​។ លោក​បណ្ឌិត ឈាង វណ្ណារិទ្ធ ប្រធាន​វិទ្យា​ស្ថាន​ចក្ខុ​វិស័យ​អាស៊ី ថ្លែង​ថា​ធន​ធាន​មនុស្ស​សម្រាប់​វិភាគ​កំរិត​តំបន់ និង​អន្តរ​ជាតិ កម្ពុជា​នៅ​មាន​កំរិត ដោយ​សារ​មាន​ការ​ខ្វះ​ខាត​ថវិកា​។ តាម​លោក ឈាង វណ្ណារិទ្ធ វិទ្យាស្ថាន AVI នឹង​ជួយ​​ជំរុញ​​ឲ្យ​​បញ្ញវន្ត​ខ្មែរ​មាន​សម្លេង​កាន់​តែ​ខ្លាំង​ក្នុង​ការ​វិភាគ​លើ​ឆាក​អន្តរ​ជាតិ តាម​រយៈ​ការ​បណ្តុះ​បណ្តាល​ចាប់​ពី​ពេល​នេះ​តទៅ ដើម្បី​សម្រេច​ទស្សនៈ​ទាន​ចង់​ក្លាយ​ជា​ប្រទេស​មាន​ចំណូល​ខ្ពស់​នៅ​ឆ្នាំ​២០​៥០​។

ភ្ញៀវប្រចាំថ្ងៃរបស់យើងនៅរាត្រីនេះ គឺលោកផុស សុវណ្ណ ដែលជាអគ្គនាយកនៃអគ្គនាយកដ្ឋាន​ព័ត៌មាន និង​សោតទស្សន៍នៃ​ក្រសួង​ព័ត៌មានកម្ពុជា​។​​ ឆ្លើយតបនឹងសំណួររបស់វណ្ណ សុគន្ធា ជុំវិញបញ្ហាព័ត៌មានក្លែងក្លាយ លោកផុស សុវណ្ណ បានអះអាងថា ក្រសួងព័ត៌មាននឹងសហការជាមួយ​ក្រសួងមហាផ្ទៃ ក្រសួង​ប្រៃសណីយ៍ ​និង​ក្រុមហ៊ុន​ហ្វេ​ស​ប៊ុ​ក ​ដើម្បីឈានទៅបិទ​ទំព័រ​ហ្វេ​ស​ប៊ុ​ក​ ឫវេបសាយព័ត៌មានណាដែល​ផ្សព្វផ្សាយ​ព័ត៌មាន​មិន​ពិត​ជុំវិញបញ្ហាមេរោគ​កូ​រ៉ូ​ណា ​និង​ព័ត៌មាន​ក្លែងក្លាយ​ផ្សេងៗទៀត​។

ភ្ញៀវ​ប្រចាំ​ថ្ងៃ​របស់​យើង​នៅ​រាត្រី​នេះ គឺ​លោក​លី សូវ៉ាន់ អ្នកនាំ​ពាក្យ​ក្រសួង​សុខា​ភិបាល​កម្ពុជា​។ ឆ្លើយ​តប​នឹង​ការ​ចុះ​ផ្សាយ​របស់​កាសែត​ជា​ភាសា​ចិន​មួយ​ដែល​ថា​មាន​ជន​ជាតិ​ចិន​៣នាក់​បាន​ឆ្លង​មេរោគ​កូរ៉ូណា​ក្រោយ​ចាក​ចេញ​ពី​កម្ពុជា​នោះ លោក​លី សូវ៉ាន់ បាន​លើក​ឡើង​ថា ពួក​គេ​ទាំង​នោះ​អាច​ប្រហែល​ឆ្លង​ពី​ជន​ជាតិ​ចិន​ដូច​គ្នា​ពេល​ធ្វើ​ដំណើរ​តាម​យន្ត​ហោះ ឫ ពេល​ទៅ​ដល់ និង​ស្នាក់​នៅ​ក្នុង​ប្រទេស​ចិន​។ លោក​បន្ថែម​ថា ពេល​ស្នាក់​នៅ​កម្ពុជា ជន​ជាតិ​ចិន​ទាំង​៣នាក់​នេះ​ត្រូវ​បាន​ពិនិត្យ​សុខ​ភាព តែ​រក​មិន​ឃើញ​នូវ​រោគ​សញ្ញា​នៃ​មេរោគ​កូរ៉ូ​ណា​នេះ​នោះ​ទេ​។