គណៈ​កម្មការ​ជាតិ ដើម្បី​ទប់​ស្កាត់​និង​បង្ក្រាប​បទ​ល្មើស​ធន​ធាន​ធម្មជាតិ បាន​ចេញ​សេចក្តី​​ប្រកាស​ព័ត៌​មាន​នៅ​ថ្ងៃ​អាទិត្យ​នេះ អំពី​លទ្ធផល នៃ​ការ​ទប់​ស្កាត់ និង​បង្រ្កាប​បទ​ល្មើស​ព្រៃឈើ​ទូទាំង​ប្រទេស​។​ រយៈ​ពេល​ពេញ​មួយ​ឆ្នាំ​២០១៩​កន្លង​មក គណៈកម្មការ​ជាតិ បាន​ឃាត់​ខ្លួន​និង​បញ្ជូន​ជន​សង្ស័យ​ពាក់​ព័ន្ធ​នឹង​បទ​ល្មើស​ព្រៃ​ឈើ​ចំនួន​៥៩​នាក់ ចាប់​យក​ឈើ​ចម្រុះ​ចំនួន​ជិត​មួយ​ម៉ឺន​ម៉ែត្រ​គូប​(៩.២១៥,៨៧៦ ) និង​ចាប់​យក​មធ្យោ​បាយ​​សរុប​ចំនួន​៤៩១​គ្រឿង​។ លោក​ឧត្តមសេនីយ៍​ត្រី ​អេង ហ៊ី ​អ្នក​នាំពាក្យ​កង​រាជអាវុធ​ហត្ថ​លើ​ផ្ទៃ​ប្រទេស បាន​ថ្លែងថា បទ​ល្មើស​ព្រៃឈើ​ទ្រង់​ទ្រាយ​ធំ​បាន​ស្ងប់​ស្ងាត់​ហើយ តែ​បទ​ល្មើស​តូច​តាច​នៅ​បន្ត​កើត​មាន​។

ក្លិប​អ្នក​កាសែត​កម្ពុជា ​នៅ​ព្រឹក​ថ្ងៃទី ​០១ ​ខែ ​កុមៈ ​នេះ ​បាន​រៀបចំ​ការ​បោះ​ឆ្នោត​ជ្រើស​រើស​សមាជិក​គណៈកម្មាធិការ​នាយក​ចំនួន​០៩​រូប​ សម្រាប់​អាណត្តិ​ថ្មី ​អាណត្តិ​ទី​៦ ​ដោយ​មាន​ការ​ចូល​រួម​ពី​​សមាជិក​ សមាជិកា​ចូលរួម​១៦៤​នាក់​។ ​ក្នុង​នោះ ​លោក ​ប៉ែន​ បូណា ​អតីត​និពន្ធ​នាយក​វិទ្យុ​បារាំង​អន្តរជាតិ ​RFI​ ហើយ​បច្ចុប្បន្ន ​គឺ​ជា​និពន្ធ​នាយក​ទូរទស្សន៍ P​NN​ ត្រូវ​បាន​បោះ​ឆ្នោត​ឲ្យ​ធ្វើ​ជា​ប្រធាន​ក្លិប​ក្នុង​អាណត្តិ​ទី៦ ​ហើយ​ត្រូវ​ជា​អាណត្តិទី២​របស់​លោក​ដែល​មាន​រយៈពេល​៤​ឆ្នាំ​បន្ត​ទៅ​មុខ​ទៀត​។ នៅ​ក្នុង​អាណត្តិ​ថ្មី ​លោក​ ប៉ែន​ បូណា ​នឹង​បន្ត​បេសកម្ម​ចំនួន​បួន​របស់​ក្លិប​ ជា​ពិសេស​ការ​ជំរុញ​​ឲ្យ​​អ្នក​សារព័ត៌មាន​កម្ពុជា​ទាំង​អស់ ​រួមគ្នា​ដើម្បី​ការពារ​និង​លើក​ស្ទួយ​វិជ្ជាជីវៈ​សារព័ត៌មាន​នៅ​កម្ពុជា​។ ​សម្រាប់​លោក​ ប៉ែន បូណា ​វិជ្ជាជីវៈ​សារព័ត៌មាន​ គឺ​ជា​អាវ​ក្រោះ​របស់​អ្នក​កាសែត​។

ព្រឹក​មិញ សមាគម​ខ្មែរ​កម្ពុជា​ក្រោម ដើម្បី​សិទ្ធិ​មនុស្ស និង​អភិវឌ្ឍន៍​បាន​ចេញ​ផ្សាយ​ជា​ផ្លូវ​ការ​នូវ​របាយ​ការណ៍​ស្រាវ​ជ្រាវ​ស្តី​ពី បញ្ហា​ខ្មែរ​ក្រោម​។ ដូច្នេះ​នៅ​រាត្រី​នេះ លោក សឺន ជុំជួន ដែល​ជា​អគ្គ​លេខា​ធិការ​សមា​គម​ខ្មែរ​កម្ពុជា​ក្រោម ដើម្បី​សិទ្ធិ​មនុស្ស និង​អភិវឌ្ឍន៍ គឺ​ជា​ភ្ញៀវ​ប្រចាំថ្ងៃ​របស់​យើង​។ លោក​សឺន ជុំជួន បាន​គូស​បញ្ជាក់​ឱ្យ​ដឹង​ថា បញ្ហា​ប្រឈម​ដ៏​ធំ​បំផុត​របស់​ពល​រដ្ឋ​ខ្មែរ​ក្រោម​នៅ​លើ​ទឹក​ដី​កម្ពុជា គឺ​ការ​មិន​ទាន់​ទទួល​សិទ្ធិ​រស់​នៅ​ស្រប​ច្បាប់​ត្រឹម​ត្រូវ និង បញ្ហា​អនក្ខរ​កម្ម ដែល​ភាគ​ច្រើន​កើត​ឡើង​លើ​ស្រ្តី​។

អំឡុង​ពេល​ដែល​ប្រទេស​កម្ពុជា និង​ពិភព​លោក​កំពុង​ផ្តោត​ទៅ​លើ​ការ​ព្រួយ​បារម្ភ និង​ការ​ប្រយុទ្ធ​ប្រឆំាង​ទល់​នឹង​មេរោគ​ផ្លូវ​ដង្ហើម​កូរ៉ូណា​ថ្មី ដែល​បាន​រក​ឃើញ​នៅ​កម្ពុជា​មួយ​ករណី​ដែរ​នោះ ប្រព័ន្ធ​ផ្សព្វ​ផ្សាយ ដែល​មិន​មាន​វិជ្ជា​ជីវៈ និង​បណ្តាញ​សង្គម​មួយ​ចំនួន បាន​ផ្សាយ​ព័ត៌មាន​មួយ​ចំនួន​ខុស​ពី​ការ​ពិត បំពុល​សង្គម​ទាក់​ទង​ទៅ​នឹង​ការ​ឆ្លង​មេរោគ​ថ្មី​នេះ​។ ប្រឈម​នឹង​បញ្ហា​នេះ លោក មាស សុភ័ណ្ឌ អ្នក​នាំ​ពាក្យ​ក្រសួង​ព័ត៌​មាន បាន​បញ្ជាក់​ថា​ក្រសួង​ព័ត៌មាន​ពេល​នេះ មាន​គោល​ការណ៍​ណែ​នាំ អប់រំ ជា​បឋម ហើយ​ប្រសិន​បើ​នៅ​បន្ត​ផ្សាយ​ដោយ​មិន​ត្រឹម​ត្រូវ​ទៀត នោះ​ក្រសួង​នឹង​ត្រូវ​ចាត់​វិធាន​ការ​តាម​ផ្លូវ​ច្បាប់​។

ភ្ញៀវ​ប្រចាំថ្ងៃ​របស់​វិទ្យុ​បារាំង​អន្តរជាតិ​ RFI នៅ​រាត្រី​នេះ គឺ​លោក​វេជ្ជ​បណ្ឌិត ម៉ម ប៊ុនហេង រដ្ឋ​មន្ត្រី​ក្រសួង​សុខា​ភិបាល​នៃ​ប្រទេស​កម្ពុជា​។ ក្រសួង​សុខា​ភិបាល​នៅថ្ងៃពុធ ទី២៩ មករានេះ បាន​ច្រាន​ចោល​ចំពោះ​ព័ត៌មាន​ដែល​ថា កម្ពុជា​មាន​ឆ្លង​ករណី​ថ្មី​នៃ​មេរោគ​កូរ៉ូណា​វីរុស ចំនួន​ពីរ​ករណី​ទៀត នៅ​ក្នុង​ខេត្ត​កោះ​កុង​។ ប៉ុន្តែ​ទាំង​មន្ទីរ​សុខា​ភិបាល​ខេត្ត​កោះកុង និង​ទាំង​រដ្ឋ​មន្ត្រី​ក្រសួង​សុខា​ភិបាល​បាន​ច្រាន​ចោល។ ដោយ​ឡែក ទាក់​ទង​នឹង​ស្ថាន​ភាព​ជំងឺ​របស់​បុរស​ជន​ជាតិ​ចិន​ដែល​អះអាង​ថា មាន​ផ្ទុក​មេរោគ​រលាក​សួត​ប្រភេទ​ថ្មីនៅ​ខេត្ត​ព្រះ​សីហនុ​ឯណេះ​វិញ ត្រូវ​បាន​រដ្ឋ​មន្ត្រី​ក្រសួង​សុខា​ភិបាល​លោក ម៉ម ប៊ុនហេង បញ្ជាក់​ថា បាន​ធូរ​ស្បើយ​ឡើង​វិញ​ហើយ ប៉ុន្តែ​កំពុង​ស្ថិត​នៅ​ក្នុង​ការ​តាម​ដាន​។

ជនជាតិ​ចិន​ប្រមាណ​ជាង​៣ពាន់​នាក់​មក​ពី​ទីក្រុង​Wuhan​កំពុង​ស្នាក់​នៅ​កម្ពុជា​ដែល​បង្កើត​ជា​ក្តី​បារម្ភ​ក្នុង​ការ​ចម្លង​មេរោគប្រភេទថ្មី ខណៈកម្ពុជាទើប​រក​ករណីកូរ៉ូណា​វីរុស​ឆ្លង​ទៅលើ​បុរសជនជាតិចិនម្នាក់​នៅខេត្ត​ព្រះ​សីហនុកាលពីម្សិលមិញ។ អ្នកនាំពាក្យ​អាកាសចរណ៍​ស៊ី​វិល​ ​បានអះអាងថា កម្ពុជាមិន​បញ្ជួន​ជនជាតិ​ចិនទាំងនោះ​ទៅ​កាន់​តំបន់​Wuhanបានភ្លាមៗទេ ដោយ​សារតែ​អាជ្ញាធរចិនខ្លួន​ឯង​បិទជើង​ហោះ​ហើរ។

នៅ​ថ្ងៃ​នេះ អង្គ​ភាព​នគរបាល​ច្រក​ទ្វារ​ព្រំ​ដែន​អន្តរ​ជាតិ​ប៉ោយ​ប៉ែត​បាន​ចាប់​ផ្តើម​ចែក​ម៉ាស​ដល់​ប្រជា​ពល​រដ្ឋ​ដែល​ឆ្លង​កាត់​ច្រក​ទ្វារ​ព្រំ​ដែន​អន្តរ​ជាតិ​ប៉ោយ​ប៉ែត ដើម្បី​ការពារ​ការ​ចម្លង​ជំងឺ​ថ្មី​ដែល​បង្ក​ឡើង​ដោយ​មេរោគ​កូរ៉ូណា​វីរុស​។ លោក​គាត ហ៊ុល អភិបាល​ក្រុង​ប៉ោយ​ប៉ែត​ដែល​ជា​ភ្ញៀវ​ប្រចាំ​ថ្ងៃ​របស់​យើង​នៅ​រាត្រី​នេះ បាន​អះ​អាង​ថា ការ​ចែក​ម៉ាស​នេះ គឺ​ចែក​ឱ្យ​ទាំង​ជន​ជាតិ​ខ្មែរ និង បរទេស រួម​ទាំង​សិស្ស​សាលា​ផង​ដែរ។ យ៉ាង​ណា​ក៏​ដោយ លោក​ក៏​បាន​លើក​ឡើង​ផង​ដែរ​ថា អាជ្ញាធរ​នឹង​បន្ត​ព្យា​យាម​ស្វែង​រក​ទិញ​ម៉ាស​យក​មក​ចែក​ជូន​ដល់​ប្រជា​ពលរដ្ឋ​ជា​រៀង​រាល់​ថ្ងៃ បើ​ទោះ​បី​តម្លៃ​ម៉ាស​ឡើង​ថ្លៃ​ខ្លាំង​ក៏​ដោយ​។

ក្រសួង​សុខាភិបាល​នៅថ្ងៃ​អាទិត្យ​នេះ ​បាន​ចេញ​សេចក្តី​ជូន​ដំណឹង​ជា​ថ្មី​ថា ​កម្ពុជា​នៅ​មិន​ទាន់​មាន​ករណី​ជំងឺ​រលាក​សួត​ប្រភេទ​ថ្មី ​ដោយ​វីរុស ​កូរ៉ូណា​នៅ​ឡើយ​ទេ​។​ សេចក្តី​ជូន​ដំណឹង​នេះ ​គឺ​ជា​ការ​ឆ្លើយ​តប​ទៅ​នឹង​ម្ចាស់​អាក់​ខោន​ហ្វេស​បុក​មួយ​ចំនួន​ដែល​ផ្សាយ​ថា ​​មាន​​ករណី​​ជំងឺ​​ខាង​​លើ​​នេះ​​ ត្រូវ​បាន​រក​ឃើញ​នៅ​កម្ពុជា​ហើយ​។ ​កម្ពុជា​មាន​ករណី​សង្ស័យ​តែ​បី​ករណី​ប៉ុណ្ណោះ ​តែ​ក្រោយ​ការ​ធ្វើ​តេស្ត​ទៅ ​បញ្ជាក់​ថា ​មិន​មាន​នោះ​ទេ​។ ​យ៉ាង​ណា​ក៏​ដោយ ​លោក​ស្រី​វេជ្ជបណ្ឌិត​ ឱ វណ្ណឌីន​ រដ្ឋ​លេខា​ធិកា​រ ​និង​ជា​អ្នក​នាំ​ពាក្យ​ក្រសួង​សុខាភិបាល ​ដែល​ជា​ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរជាតិ​នៅ​រាត្រី​នេះ​បាន​មក​បញ្ជាក់​បន្ថែម​ថា ​គិត​ត្រឹម​ថ្ងៃ​​អាទិត្យ​នេះ ​កម្ពុជា​នៅ​មិន​ទាន់​មាន​ករណី​ជំងឺ​រលាក​សួត​ប្រភេទ​ថ្មី ​ដោយ​វីរុស ​កូរ៉ូណា​នៅ​ឡើយ​ទេ ​ខណៈ​ជំងឺ​នេះ​បាន​ឆ្លង​មក​ដល់​ប្រទេស​នៅ​ក្នុង​តំបន់​អាស៊ាន​ចំនួន​៤ ​និង​ប្រទេស​ធំៗ​មួយ​ចំនួន​ទៀត ​សរុប​១៩៧៥​ករណី ​និង​បណ្តាល​ឲ្យ​មនុស្ស​៥៦​នាក់​បាន​ស្លាប់​នៅ​ក្នុង​ប្រទេស​ចិ​ន​។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្ដរជាតិ RFI នា​ថ្ងៃ​នេះ គឺ​លោក គង់ រតនៈ ប្រធាន​វិទ្យាស្ថានជាតិ​សុវត្ថិភាព​ចរាចរណ៍​ផ្លូវ​គោក​។ នៅ​ចំពោះ​មុខ​អត្រា​កំណើន​នៃ​អ្នក​ស្លាប់​ដោយ​សារ​គ្រោះ​ថ្នាក់ចរាចរណ៍​នៅ​កម្ពុជា លោក គង់ រតនៈ បាន​ចាត់​ទុក​ការ​រឹត​បន្តឹង​ច្បាប់​ចរាចរណ៍ ថា​ជារឿង​ល្អ​និង​ចាំ​បាច់​​។ បើ​តាម​ការ​មើល​ឃើញ​របស់​លោក គង់ រតនៈ ការ​អនុវត្ត​ច្បាប់​ចរាចរណ៍​នៅ​កម្ពុជា​នា​ពេល​បច្ចុប្បន្ន នៅ​មាន​ភាព​ធូរ​រលុង​ច្រើន​ ដោយ​សារ​តែ​ពលរដ្ឋ​ប្រើ​ប្រាស់​ផ្លូវ ចេះ​ច្បាប់ តែ​បំពាន​ច្បាប់។ និង​ដោយ​សារ​តែ​មន្ដ្រី​អនុវត្ត​ច្បាប់ ប្រព្រឹត្ត​អំពើ​ពុក​រលួយ និង​ប្រកាន់​បក្ស​ពួក​។

ភ្ញៀវ​ប្រចាំ​ថ្ងៃ​របស់​យើង​នៅ​រាត្រី​នេះ ​គឺ​លោក​ផែង ហេង ​សហ​មេធាវី​ម្នាក់​របស់​លោក​កឹម សុខា​។ ​ម្សិលមិញ​ មេ​ធាវី​តំណាង​រដ្ឋាភិបាល​កម្ពុជា​បាន​គូស​បញ្ជាក់​ថា ​ការ​លើក​ឡើង​ទាំង​ឡាយ​របស់​លោក​សម រង្ស៊ី នៅ​លើ​ទំព័រ​ហ្វេស​ប៊ុក នឹង​ក្លាយ​ជា​ភស្តុ​តាង​បន្ថែម​សម្រាប់​តុលាការ​ក្នុង​ការ​ដាក់​បន្ទុក​ទៅ​លើ​លោក​កឹម សុខា ក្នុង​សំណុំ​រឿង​ក្បត់​ជាតិ​ដែល​តុលា​ការ​ក្រុង​ភ្នំពេញ​កំពុង​ដំណើរ​ការ​ជំនុំ​ជម្រះ​ក្តី​។ ប៉ុន្តែ លោក​មេធាវីផែង ហេង ពុំយល់​ឃើញ​ដូច្នោះ​ឡើយ ដោយ​លោក​លើក​ឡើង​ថា សម្តី​របស់​លោក​សម រង្ស៊ី គឺ​គ្មាន​ទម្ងន់​អ្វី​ក្នុង​ការ​ដាក់​បន្ទុក​ទេ ព្រោះ​ជា​សម្តី​បែប​ឌឺ​ដង​តែ​ប៉ុណ្ណោះ​។