សវនា​ការ​លើ​សំណុំ​រឿង​សន្ទិ​ដ្ឋិ​ភាព​របស់​លោក កឹម សុខា បាន​បញ្ចប់​ដំណើរ​ការ​សប្តាហ៍​ទីពីរ​ហើយ​កាល​ពី​ព្រឹក​ថ្ងៃ​ព្រហស្បតិ៍នេះ ដោយ​មេធាវី​ការពារ​ក្តី​ទាំង​សង​ខាង បន្ត​ជជែក​វែក​ញែក តឹង​សសៃ​ក​ដាក់​គ្នា ជុំវិញ​ការ​ដាក់​ភស្តុ​តាង​បន្ថែម​ជា​ឃ្លីប​វីដេអូ​របស់​មេធាវី​ការពារ​ចុង​ចោទ​។

ទោះ​យ៉ាង​ណា មេធាវី​ការពារ​ក្តី​ភាគី​ទាំង​សង​ខាង បាន​លើក​ហេតុ​ផល​រៀង​ខ្លួន​ជុំវិញ​ខ្លឹម​សារ សំខាន់ៗ ដែល​លោក​កឹម សុខា បាន​ថ្លែង​នៅ​ក្នុង​ឃ្លីប​វីដេអូ ទាំង​ឃ្លីប​វែង និង​ឃ្លីប​ខ្លីៗ។

គិត​ត្រឹម​ថ្ងៃទី ២២ មករា ឆ្នាំ ២០២០នេះ កម្ពុជា​នៅ​មិន​ទាន់​រក​ឃើញ​ករណី​នៃ​ការ​ឆ្លង​ជំងឺ​រលាក​សួត​ប្រភេទ​ថ្មី ដែល​បង្ក​ឡើង​ដោយ​មេរោគ​កូរ៉ូណា​វីរុស​នៅ​ឡើយ​ទេ។ ប៉ុន្តែ​យ៉ាង​ណា​ក្តី លោក​ស្រី ឱ វណ្ណឌីន រដ្ឋលេខាធិការ​និង​ជា​អ្នក​នាំ​ពាក្យ​ក្រសួង​សុខា​ភិបាល បាន​អំពាវ​នាវ​ឲ្យ​ប្រជា​ពលរដ្ឋ​កម្ពុជា​រក្សា​អនាម័យ​ឲ្យ​បាន​ខ្ពស់ ដើម្បី​បង្កា​ឆ្លង​មេរោគ​ប្រភេទ​ថ្មី​នេះ ខណៈ​ពេល​ដែល​ក្រសួង​សុខា​ភិបាល បាន​ដាក់​ចេញ​នូវ​វិធាន​ការ​ចាំ​បាច់​នា​នា និង​ជា​បន្ទាន់ ដើម្បី​បង្កា​កុំ​ឲ្យ​មេរោគ​ប្រភេទ​ថ្មី​នេះ ឆ្លង​ចូល​មក​កម្ពុជា​បាន​។ ការ​ដាក់​ចេញ​នូវ​វិធាន​ការ​នេះ គឺ​ស្រប​ពេល​ដែល​មាន​សេចក្តី​រាយ​ការណ៍​ថា ប្រទេស​ជិត​ខាង​កម្ពុជា តួ​យ៉ាង​ដូច​ជា ប្រទេស​ថៃ មាន​ឆ្លង​ជំងឺនេះ​ចំនួន​២ករណី ជប៉ុន១ករណី និងកូរ៉េ​ខាង​ត្បូង​១ករណី​ផង​ដែរ​។ ជំងឺ​រលាក​សួត​ប្រភេទ​ថ្មី ដែល​មាន​ប្រភព​មក​ពី​ខេត្ត វូហាន ប្រទេស​ចិន បាន​ឆ្លង​ទៅ​មនុស្ស​ចំនួន​៤៤៥​ករណី និង​បាន​បណ្តាល​ឲ្យ​ស្លាប់​៩នាក់​ហើយ គិត​ត្រឹម​ល្ងាច​ថ្ងៃទី ២២ មករា​នេះ​។ បើ​តាម​លោក​ស្រី ឱ វណ្ណឌីន ប្រជាជន​កម្ពុជា​ណា​ដែល​មាន​បំណង​ទៅ​លេង​កំសាន្ត​នៅ​ក្នុង​ខេត្ត វូហាន ប្រទេស​ចិន នៅ​ក្នុង​ឱកាស​បុណ្យ​ចូល​ឆ្នាំ​ចិន ឬ​ចូល​ឆ្នាំ​ថ្មី​ប្រពៃណី​ជាតិ​ខ្មែរ គួរ​ផ្អាក​ជា​បណ្តោះ​អាសន្ន​សិន​។

លោក​ឧបនាយក​រដ្ឋមន្ត្រី ​ស ខេង ​រដ្ឋមន្ត្រី​ក្រសួង​មហាផ្ទៃ​ នៅ​ព្រឹក​ថ្ងៃ​អង្គារ​នេះ​បាន​ប្រកាស​អាសន្ន​ពី​រឿង​ចរាចរណ៍​នៅ​ក្នុង​ប្រទេស​កម្ពុជា​បច្ចុប្បន្ន ​ដោយសារ​កំណើន​នៃ​មនុស្ស​ស្លាប់ ​និង​របួស​ដោយសារ​គ្រោះថ្នាក់​ចរាចរណ៍​មានការ​កើនឡើង​ច្រើន​កាល​ពី​ឆ្នាំ​២០១៩​។ ​ជា​យន្តការ​ការងារ​ឆ្នាំ​២០២០​នេះ ​លោកស្រី​ មឹន មាណវី ​រដ្ឋលេខាធិការ​ក្រសួង​ដឹក​ជញ្ជូន​ និង​ជា​អគ្គលេខាធិការ​គណៈកម្មាធិការជាតិ​សុវត្ថិភាព​ចរាចរណ៍​ផ្លូវគោក​ថ្លែង​ថា ​ក្រុម​ការងារ​នឹង​ចាប់​ផ្តើម​ធ្វើការ​រឹតបន្តឹង​មែនទែន​ហើយ ​ដោយ​មិនមាន​ការ​លើកលែង​ទេ​។​ គណៈកម្មាធិការ​នេះ​ នឹង​ជួប​ប្រជុំ​គ្នា​នៅ​ថ្ងៃ​ទី​២៣​មករា​ខាងមុខ​ ដើម្បី​ពិនិត្យ​មើល​ផ្លូវច្បាប់​ជុំវិញ​ការ​អនុវត្ត​ការងារ​រឹត​បន្តឹង​ច្បាប់​ចរាចរណ៍​ និង​បង្កើន​ការ​ផាក​ពិន័យ​ឲ្យ​ធ្ងន់ធ្ងរ​បន្ថែម​ទៀត ​តាមរយៈ​ការ​ស្វះស្វែង​ធ្វើ​វិសោធនកម្ម​ច្បាប់​ស្តីពី​ចរាចរណ៍​ផ្លូវគោក​។

នៅ​ពេល​នេះ​ ក្រុម​មេធាវី​របស់​លោក​នាយករដ្ឋមន្រ្តី​ហ៊ុន សែន ​និង ​ក្រសួង​ព័ត៌មាន​បាន​ចាប់​ផ្តើម​ធ្វើ​ការងារ​ ជាមួយ​គ្នា​ហើយ​ជុំវិញ​ការផ្តល់​សេវា​ផ្នែក​ច្បាប់​ដល់​អ្នកសារព័ត៌មាន​វិជ្ជាជីវៈ​ដែល​មាន​បញ្ហា​ផ្លូវ​ច្បាប់​។ ​លោក​ផុស សុវណ្ណ ​អគ្គនាយក​នៃ​អគ្គនាយកដ្ឋាន​ព័ត៌មាន​និង​សោតទស្សន៍ ​និង​ ជា​អ្នកនាំពាក្យ​របស់​ក្រសួង​ព័ត៌មាន​ដែល​ជា​ភ្ញៀវ​ប្រចាំ​ថ្ងៃ​របស់​យើង​នៅ​រាត្រី​នេះ ​បាន​គូស​បញ្ជាក់​ឱ្យដឹង​ថា​ ក្រុម​មេធាវី​របស់​នាយករដ្ឋមន្រ្តី​នេះ ​គឺ​នឹង​ជួយ​ការពារ​ក្តី​តែ​សម្រាប់​អ្នកសារព័ត៌មាន ​ឬ ​សារព័ត៌មាន​ណា​ដែល​មាន​វិជ្ជាជីវៈ​តែ​ប៉ុណ្ណោះ​។

សាលា​រាជធានី​ភ្នំពេញ ​កំពុង​សិក្សា​រៀបចំ​បង្កើត​ឲ្យ​មាន​ផ្លូវ​អាទិភាព​សម្រាប់​រថយន្ត​ក្រុង​ដឹក​អ្នក​ដំណើរ​សាធារណៈ ​City ​Bus ​នៅ​ក្នុង​ទី​ក្រុង​ភ្នំពេញ​។ ​ជា​ឧទាហរណ៍​ អាជ្ញាធរ​ក្រុង​ភ្នំពេញ ​នឹង​ជ្រើស​រើស​យក​ទ្រូង​ផ្លូវ​មួយ ​ចាប់​ពី​ផ្សារ​ធំ​ថ្មី ​រហូតដ​ល់​ច្រមុះ​ជ្រូក​ស្ទឹង​មានជ័យ ​ដើម្បី​រៀបចំ​ឲ្យ​មាន​ផ្លូវ​អាទិភាព​មួយ​នេះ។​នេះ​គឺ​ជា​ការ​បោះ​ជំហាន​ថ្មី​មួយ​ទៀត​របស់​សាលា​រាជ​ធានី​ភ្នំពេញ ​ក្នុង​កំណែទ​ម្រង់​លើ​មធ្យោបាយ​ដឹក​ដំណើរ​តាម​រថយន្ត​ក្រុង​​សាធារណៈ​​នៅ​​ក្នុង​ទីក្រុង ​ស្រប​ពេល​ដែល​មាន​ការ​កក​ស្ទះ​ចរាចរណ៍​ស្ទើ​រៀង​រាល់​ថ្ងៃ​។ ​ដូច្នេះ ​​ភ្ញៀវ​​ប្រចាំថ្ងៃ​​របស់​​វិទ្យុ​​បារាំង​​អន្តរជាតិ​​ RFI​​ នៅ​រាត្រី​នេះ ​គឺ​លោក​ ម៉េត ​មាស​ភក្តី ​អ្នក​នាំ​ពា​ក្យ​សាលារាជ​ធានី​ភ្នំពេញ​។ ​លោក​នឹង​ចូល​មក​ជំរាប​ជូនថា​ ​តើ​ផ្លូវ​អាទិភាព​នេះ ​នឹង​រៀប​ចំ​នៅ​ពេល​ណា ​និង​ដោយ​របៀប​ណា?​ ហើយ​ថា ​ផ្លូវ​អាទិភាព​នេះ ​គ្រោង​ដាក់​ឲ្យ​ដំណើរ​កា​​រនៅ​ពេល​ណា?​ សម្រាប់​អ្នក​នាំ​ពាក្យ​រូប​នេះ ​ការ​បង្កើត​ឲ្យមា​ន​ផ្លូវ​អាទិភាព​សម្រាប់​រថយន្ត​ក្រុង​សាធារណៈនេះ​ ​គឺ​ដើម្បីទា​ក់​ទាញ​ប្រជាពលរដ្ឋ​ឲ្យ​ធ្វើ​ដំណើរ​តាម​រថយន្ត​ក្រុង​សាធារណៈកាន់​តែ​ច្រើន​ឡើង ​និង​ក៏​ដើម្បី​ជួយ​កាត់​បន្ថ​យ​ការ​កក​ស្ទះ​ចរាចរណ៍​នៅ​ក្នុង​ទីក្រុង​ភ្នំពេញ​ផង​ដែរ។

សំណុំ​រឿងក្រុម​​យុវតី​ប្រើប្រាស់​អំពើ​ហិង្សា​នៅ​វិទ្យាល័យ​ផ្សារ​ដើម​ថ្កូវ នៅ​តែបន្ត​​ជា​បច្ចុប្បន្នភាព បើ​ទោះ​បី​ជា​អាណាព្យាបាល​យុវតី​បង្ក​ហេតុ សុខ​ចិត្ត​បង់​សំណង​ជា​ប្រាក់​ដើម្បី​បញ្ចប់​រឿង​ក៏​ដោយ។ មតិជា​ច្រើន​តាម​បណ្ដាញ​សង្គម ​បាន​បន្ត​ប្រើ​ពាក្យពេចន៍​វាយ​ប្រហារ​ទៅ​លើក្រុម​​យុវតី​បង្ក​ហេតុ​ ហើយ​ខ្លះ​ទៀតទាមទារ​ឲ្យ​មាន​ការ​ដាក់​ពិន័យ​ទោសទណ្ឌ​ដល់​យុវតី​ទាំង​នោះ​ទៅ​តាម​ច្បាប់​។ លោក​បណ្ឌិត ប៉ា ច័ន្ទរឿន ប្រធាន​មជ្ឈមណ្ឌល​ទស្សនវិជ្ជា​អនុវត្ត​ន៍និងសីលធម៌​កម្ពុជា ដែល​ជា​ភ្ញៀវ​ប្រចាំ​ថ្ងៃ​របស់​វិទ្យុ​យើង យល់​ឃើញ​ថា ការ​ដាក់​ពិន័យ​ទៅ​លើ​យុវតី​បង្ក​ហេតុ គឺ​ជា​រឿង​ចាំ​បាច់​។ ប៉ុន្តែ​ការ​ដាក់​ពិន័យ​នេះ​ត្រូវ​ធ្វើ​ដោយ​ប្រយ័ត្ន​បំផុត ព្រោះ​បើ​តាម​លោក​បណ្ឌិត ពួក​គេ​ទាំង​នោះ​នៅ​ជា​អនីតិជន​នៅ​ឡើយ​។ លោក​ថា គោលដៅ​នៃ​ការ​ដាក់​ពិន័យ មិន​មែន​គ្រាន់​តែ​ដើម្បី «ស៊ីសង» ទៅ​នឹង​អ្វី​ដែល​ពួក​គេ​បាន​ប្រព្រឹត្ត​នោះ​ទេ តែ​គឺ​ដើម្បី​អប់រំ​ណែនាំ​ពួក​គេ​ឲ្យ​ដើរ​តាម​ផ្លូវ​ត្រឹម​ត្រូវ​វិញ​។

ក្រសួង​បរិស្ថាន​បាន​ឲ្យ​ដឹង​ថា​កំរិត​ភាគ​ល្អិត​និចល​នៅ​ក្នុង​ខ្យល់ PM2.5 មាន​ការ​កើន​ឡើង​គួរ​ឲ្យ​កត់​សម្គាល់​នៅ​ក្នុង​រយៈ​ពេល​ប៉ុន្មាន​ថ្ងៃ​នេះ ដែល​ចំណុច​នេះ​ក្រសួង​បរិស្ថាន​កម្ពុជា​កំពុង​តែ​ធ្វើ​ការ​តាម​ដាន​យ៉ាង​យក​ចិត្ត​ទុក​ដាក់​។ ជាមួយ​គ្នា​នេះ កំរិត​កើន​ឡើង​នៃ​គុណ​ភាព​ខ្យល់​នៅ​ពេល​នេះ ក៏​បាន​ធ្វើ​ឲ្យ​មាន​ការ​ព្រួយ​បារម្ភ​ផង​ដែរ​ពី​មហា​ជន ដោយ​សារ​មាន​ការ​យល់​ថាកំរិត​ភាគ​ល្អិត PM2.5 ពេល​នេះ ដល់​កំរិត​ដែល​ធ្វើ​ឲ្យ​ប៉ះពាល់​ដល់​សុខ​ភាព​។ ទោះ​យ៉ាង​ណា លោក នេត្រ ភក្ត្រា អ្នក​នាំ​ពាក្យ​ក្រសួង​បរិស្ថាន​បញ្ជាក់​ថា ព័ត៌មាន​ទាំង​ឡាយ​ណា ក្រៅ​ពី​ក្រសួង​បរិស្ថាន គឺ​មិន​មែន​ជា​ព័ត៌មាន​ផ្លូវ​ការ​ទេ​។ តាម​លោក នេត្រ ភក្ត្រា គុណ​ភាព​ខ្យល់​ពេល​នេះ មិន​ទាន់​ឈាន​ដល់​ចំណុច​គ្រោះ​ថ្នាក់​ដល់​សុខ​ភាព​ធ្ងន់​ធ្ងរ​នោះ​ទេ​។

ការ​ស្នើ​សុំ​ដាក់​ភស្តុ​តាង​ថ្មី​ជា​វីដេអូ​ឃ្លីប​ពេញ​របស់​លោក កឹម សុខា និងការ​តាំង​សំណួរ​លើ​លោក កឹម សុខា បាន​ក្លាយ​ជា​ចំណុច​តាន​តឹង នៅ​ក្នុង​សវនាការ​កាត់​ទោស​លោក កឹម សុខា រយៈ​ពេល​ពីរ​ថ្ងៃ​មក​នេះ។ សវនា​ការ សប្តាហ៍​ទីមួយ ដែល​បាន​បិទ​បញ្ចប់​នៅ​រសៀល​ថ្ងៃ​ទី ១៦ មករា នេះ ត្រូវ​បាន​គេ​មើល​ឃើញ​ថា មាន​ភាព​តាន​តឹង​។ យ៉ាង​ណា​ក្តី នៅ​ក្នុង​បទ​សម្ភាសន៍​ជា​ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរ​ជាតិ​ នៅ​រាត្រី​នេះ លោក គី តិច មេធាវី​ការពារ​ក្តី​រដ្ឋា​ភិបាល​បាន​លើក​ឡើង​ថា ក្រុម​មេធាវី​ការពារ​ក្តី​លោក កឹម សុខា ហាក់​មាន​ចេតនា​ចោទ​សួរ ដើម្បី​ធ្វើ​ឲ្យ​អ្នក​ចូល​រួម​ស្តាប់​អង្គ​សវនាការ​យល់​ច្រឡំ​ថា ក្រុម​ប្រឹក្សា​ជំនុំ​ជម្រះ​បិទ​សិទ្ធ​ក្រុម​មេធាវី​។ ប៉ុន្តែ​លោក​ស្រី ម៉េង សុភារី មេធាវី​ការពារ​ក្តី​លោក កឹម សុខា បាន​ឆ្លើយ​តប​ថា ការ​លើក​ឡើង​របស់​លោក​មេធាវី គី តិច គឺ​និយាយ​យក​ត្រូវ​តែ​ប៉ុណ្ណោះ​។

សវនាការ​ពាក់​ព័ន្ធ​នឹង​សំណុំ​រឿង​ក្បត់​ជាតិ​របស់​លោក កឹម សុខា ប្រធាន​អតីត​គណ​បក្ស​សង្គ្រោះ​ជាតិ បាន​ចាប់​ផ្តើម​ហើយ​នៅ​ថ្ងៃ​ពុធ​នេះ គឺ​បន្ទាប់​ពី​មេដឹក​នាំ​បក្ស​ប្រឆាំង​រូប​នេះ​ត្រូវ​បាន​សមត្ថកិច្ច​ចាប់​ខ្លួន​កាល​ពីថ្ងៃទី៣ ខែកញ្ញា ឆ្នាំ​២០១៧​។ ក៏​ប៉ុន្តែ​អ្វី​ដែល​មាន​ការ​ខក​ចិត្ត​ពី​សំណាក់​អ្នក​ឃ្លាំ​មើល​សង្គម និង​នយោ​បាយ​នោះ​គឺ សវនាការ​នេះ ត្រូវ​បាន​គេ​មើល​ឃើញ​ថា​ជា​សវនាការ​សាធារណៈ​បែប​ចង្អៀត​។ នេះ​បើ​តាម​លោក អំ សំអាត នាយក​រង​ផ្នែក​ឃ្លាំ​មើល ​និង​ការពារ​សិទ្ធិ​មនុស្ស​នៃ​អង្គការ​លីកាដូ។ លោក​ថា តុលា​ការ​គួរ​តែ​សម្រួល​ឲ្យ​មាន​ការ បើក​ទូលាយ​ឲ្យ​សាធារណ​ជន​បាន​ចូល​ស្តាប់​ច្រើន ដើម្បី​អស់​មន្ទិល​សង្ស័យ​ជុំវិញ​សំណុំ​រឿង​ដ៏​ធំនេះ​។

អ្នក​សារព័ត៌មាន​នៅ​កម្ពុជា​ប្រមាណ​៥០០០​នាក់ ត្រូវ​បាន​អនុញ្ញាត​ឲ្យ​ចូល​រួម​កម្មវិធី​អាហារ​សាមគ្គី​ជាមួយ​ប្រមុខ​រដ្ឋា​ភិបាល​នៅ​រាត្រី​នេះ នៅ​មជ្ឈ​មណ្ឌល​កោះ​ពេជ្រ​។ ជំនួប​លើក​ទី៤​នេះ ក៏​ដូច​ជា​ជំនួប​៣ឆ្នាំ​កន្លង​មក​ដែរ ពោល​អ្នក​សារព័ត៌មាន​មិន​ត្រូវ​បាន​អនុញ្ញាត​ឲ្យ​លើក​ជា​សំណួរ​ត្រង់ៗ​ទៅ​កាន់​លោក​នាយក​រដ្ឋ​មន្ត្រី ហ៊ុន សែន ឡើយ។ លោក មាស សោភ័ណ្ឌ អ្នក​នាំ​ពាក្យ​ក្រសួង​ព័ត៌មាន បាន​អះអាង​ថា ការ​មិន​អនុញ្ញាត​ឲ្យ​អ្នក​សារព័ត៌​ចោទ​សួរ​ទៅ​កាន់​ប្រមុខ​រដ្ឋាភិបាល​ដោយសារ​តែ​អ្នក​ចូល​រួម​ច្រើន​។