ឆ្នាំ២០២២នេះ អាកាសធាតុពិភពលោកយើង បានបង្ហាញ​នូវ​ការប្រែប្រួលយ៉ាងខ្លាំងរហ័ស និងមាន​សន្ទុះកម្លាំង​គួរឲ្យ​ព្រួយបារម្ភបំផុត។ គ្រោះធម្មជាតិ​កាន់តែធ្ងន់ធ្ងរ បាន​បោក​សង្គ្រប់ សម្លាប់ជីវិតមនុស្ស និង​​បង្ករការលំបាកខ្លាំងឡើង​ៗ ជាក់ស្តែងគ្រោះទឹក​ជំនន់​ដ៏ធ្ងន់ធ្ងរ​នៅ​ប៉ាគីស្ថាន គ្រោះ​រាំងស្ងួត និង​​ភ្លើង​ឆេះព្រៃ​​ជាដើម។ល។ អង្គការឧតុនិយមពិភព​លោក បានចេញរបាយការណ៍ថ្មីមួយ កាលពីថ្ងៃអង្គារដើមសប្តាហ៍នេះ ដោយ​បានសន្និដ្ឋានថា ពិភពលោក​យើង កំពុងតែដើរលើ​ផ្លូវខុសហើយ ព្រោះ​កម្រិត​ឧស្ម័ន​ផ្ទះកញ្ចក់ ដែលជាដើមហេតុនៃបម្រែបម្រួលអាកាសធាតុនោះ​ មាន​ទំហំកាន់តែច្រើនឡើង មិនចុះថយទេ។ លោកអគ្គលេខាធិការអង្គការសហប្រជាជាតិ បានថ្លែងសារតាមវីដេអូ ទទូចអង្វរឲ្យ​គ្រប់​ប្រទេស ត្រូវតែ​ប្រឹងប្រែងកាត់​បន្ថយ​ការបញ្ចេញឧស្ម័នផ្ទះកញ្ចក់។