RTL - Am Takt

De Matteo huet sech de Kënschtlernumm Culture The Kid erausbruecht an och wann den 18 Joer jonke Lëtzebuerger beim The Qwest Freestyle Challenge duerch säin Talent am Beräich Hip Hop geglänzt huet (de Matteo war ee vun den 3 Gewënner) sou limitéiert hie sech awer net exklusiv op eng Richtung.

Wär keng Pandemie, wär d'Bud voll gewiescht. De Pascal Dechmann hat sech ugekënnegt fir iwwer seng nei Single ze schwätzen; de Museker huet sech um Van Halen-Klassiker Jump probéiert, zu senger Säit natierlech d'Sonna Rele mat deem hie fläisseg Lidder erausbréngt. A bei Cool Feet stinn d'Zeechen op Party, Album Nummer 12 heescht d'Party geet weider. De Rom Bernard huet erzielt wéi komplizéiert et war d'Plack wärend Corona ze realiséieren.

Jodele verbënnt een zimmlech direkt mat de Bierger. Mä mat Lëtzebuerg? (no offence Éislek). Da Yodla heescht de Projet vun den zwou Powerfraen Ingrid Schwarz an Yael de Vries. D'Ingrid wunnt zu Tréier an ass zënter e puer Joer zu Diddeleng an der Museksschoul fir Gesang z'ënnerriichten, d'Yael ass aus der Schwäiz an eng ausgebilte Musicalsängerin, an zesumme gëtt gejodelt.

Fir déi lescht Sendung virun der Ouschtervakanz (déi nächst 2 Méindeger also nix Am Takt) hat sech de Francisco Fernandez ugemellt. Den Amerikaner (California) huet sech verléift; fir d'éischt a seng Frëndin an duerno an de Grand-Duché. Déi 2 hu sech a Mexico op enger Hochzäit kenne geléiert, an elo mécht de Francisco ebe Musek vum Grand-Duché aus.

Et war eng Grëtz méi sentimental Am Takt. Den David Ianni huet mat Follow Me Home viru kuerzem en Album erausbruecht dee säin Ursprong awer schonn am Februar 2013 huet. Dann ass dem David seng Musek aktuell an enger Reklamm ze héieren a wann alles klappt, wäerten am Summer 2 Live-Optrëtter zustane kommen. Et war also genuch Material do fir en intressant Gespréich.

Mat Mutiny On The Bounty stoung de Sacha weltwäit op de Bünen. Komplett verschwonnen ass d'Band net, aktuell ass een am gaangen un enger neier Plack ze dokteren. Donieft huet de Museker a Produzent all Hänn voll ze dinn; kreativ si fir aner Museker an de Projet Them Lights op den nächste Level ze bréngen.

Tuys hu sech momentan zu Berlin verschanzt fir un neiem Material ze schaffen; dat war awer net den Haaptgrond fir hirem Gittarist, Tun Biever, eng Kéier unzeruffen. D'Plattform Two Steps Twice ass nämlech relancéiert ginn, eng duerchaus intressant Plattform fir déi nei Talenter an der Zeen.

Kuerze Resumé vun dëser Editioun; Nei an Hip Hop. Gutt, e bësse méi Erklärung ass bestëmmt net vu Muttwëll. Alsooooooo; de Max Fellinger, Lëtzebuerger deen zu Hamburg studéiert, huet mam Hardy, e jonke Mann aus der däitscher Provënz, de Projet B.M.A. (Brudis mit Attitudis) gegrënnt; dat wier mol den Hip Hop-Deel. Neits gouf et dës Kéier dann awer och vun I AM SEA an engem fréiere Member vun ANGEL AT MY TABLE.

Brasilianesch Elteren, a Portugal op d'Welt komm, mat 3 Joer op Lëtzebuerg komm an a Frankräich studéiert; d'Fernanda Stange kann een duerchaus als Biergerin vun der Welt bezeechnen. A well d'Fernanda och nach Musek mécht, a mat My Perfect Crime en neit Lidd do ass, goufen et méi wéi genuch Grënn fir d'Sängerin an d'Sendung z'invitéieren.

Leit déi schaffen, soll een een net stéieren. Dorunner huet sech de Bob dës Kéier net gehalen, an en hat och gudde Grond. De Georges Goerens huet de Weekend iwwer en éischten Deel vun enger neier EP erausbruecht, also wann dat kee Grond fir nozefroen ass wéi et mam Projet Bartleby Delicate ausgesäit.