នៅថ្ងៃសុក្រ ទី​២១មករានេះ លោកអង់តូនី ​ប្លីងកិន រដ្ឋមន្ត្រីការបរទេសអាមេរិក បាន​ជួប​ប្រជុំគ្នានៅទីក្រុងហ្សឺណែវ ជាមួយ​លោក​សែរហ្កី ឡារ៉ូវ រដ្ឋមន្ត្រីការបរទេសរុស្ស៊ី។ ជាជំនួបដែល​គេ​តាមដានបំផុត ខណៈប្រទេស​មហាអំណាចទាំង២នេះ ត្រូវនិយាយដោះស្រាយ​គ្នា អំពី​បញ្ហា​អ៊ុយក្រែន។ អស់រយៈពេល​ជាច្រើនខែមកហើយ ដែល​ប្រភពជាច្រើ​នបាន​​អះអាងថា​ រុស្ស៊ីបាន​ត្រៀម​ពង្រាយ​កម្លាំង ដើម្បីបើកការ​វាយ​ប្រហារ ឈ្លានពាន​អ៊ុយក្រែន ដើម្បី​បង្ខំឲ្យ​អាមេរិក ឲ្យ​បោះបង់ចោលគំនិត ចង់​បញ្ចូលអ៊ុយក្រែនជាសមាជិក​ថ្មីរបស់អូតង់។