យប់ថ្ងៃពុធឈានចូលថ្ងៃព្រហស្បតិ៍ទី​៩មីនា​ កងទ័ពរុស្ស៊ីបានសំរុក​បាញ់ប្លោងគ្រាប់មីស៊ីលជាច្រើនគ្រាប់ មកលើអ៊ុយក្រែន​។ យោងតាម​អាជ្ញាធរអ៊ុយក្រែន ទីតាំងហេដ្ឋារចនាសម្ព័ន្ធ​ថាមពល​នៅតាមទីក្រុង​ធំជាច្រើន បានរងនូវការខូចខាតជាខ្លាំង ដែល​កម្មវត្ថុរបស់រុស្ស៊ី គឺផ្តាច់​ចរន្តអគ្គិសនី​របស់​អ៊ុយក្រែន​។ ដោយ​ឡែកនៅឯសមរភូមិ​ភាគខាងកើតអ៊ុយក្រែន ក្រុមទាហានស៊ីឈ្នួល Wagner របស់រុស្ស៊ី បាន​ប្រកាសថាគេបាន​ដណ្តើម​គ្រប់គ្រងបាន ​ភាគខាងកើតទីក្រុងBakhmout ហើយ។ តែយ៉ាងណា បើទោះជាត្រូវគេឡោមព័ទ្ធ កងទ័ពអ៊ុយក្រែន បានប្រកាសថា នឹងបន្តតស៊ូប្រយុទ្ធ មិន​បោះបង់ទីក្រុងនេះ បើកផ្លូវឲ្យរុស្ស៊ីរុលទៅមុខបានជាដាច់ខាត។