នៅ​ក្នុង​ប្រទេស​រុស្ស៊ី ក្រសួងការពារជាតិ​បាន​ប្រកាស​ក្នុង​ថ្ងៃ​ពុធ ទី១១ មករា​ពី​ការ​ដោះដូរ​មេបញ្ជាការប្រតិបត្តិការ​យោធា​នៅ​អ៊ុយក្រែន។ លោក​ស៊ែរហ្កី ស៊ូរ៉ូវីគីន​ដែល​ទើប​ជ្រើស​តាំង​ឲ្យ​កាន់​តំណែង​មួយ​នេះ​ក្នុង​តុលា ឆ្នាំ ២០២២ ត្រូវ​បាន​វិមានក្រឹមឡាំង​ដក​ចេញ និង​ដាក់​ជំនួស​ដោយ​ឧត្តមសេនីយ​វ៉ាឡេរី ហ្កេរ៉ាស៊ីម៉ូវ។ ការ​ដោះដូរ​មេបញ្ជាការប្រតិបត្តិការ​យោធា​នៅ​អ៊ុយក្រែន​ពេល​នេះ​បាន​ធ្វើ​ឡើង ខណៈ​ដែល​សង្រ្គាម​រុស្ស៊ី​ឈ្លានពាន​ឈាន​ចូល​ជិត ១ឆ្នាំ និង​ចំ​ពេល​ដែល​កងទ័ព​រុស្ស៊ី​ហាក់​កំពុង​ចាញ់​ច្រាប​កងទ័ព​អ៊ុយក្រែន​នៅ​លើ​សមរភូមិ​កាន់​តែ​ខ្លាំង។