សង្រ្គាមអ៊ុយក្រែន​ដែលបាន​ឈានចូលដល់​ថ្ងៃទី ១៨ គិតមកត្រឹមថ្ងៃអាទិត្យ​ទី​១៣​មីនា។ នៅថ្ងៃអាទិត្យ​នេះ រុស្ស៊ី​បានបាញ់​មីស៊ីល​បំផ្លាញ មូលដ្ឋានទ័ព​ដ៏​សំខាន់មួយ ដែល​ស្ថិតនៅ​ភាគខាងលិចអ៊ុយក្រែន ក្បែរ​​ព្រំដែន​ប្រទេស​ប៉ូឡូញ។ តាម​អាជ្ញាធរ​អ៊ុយក្រែន យ៉ាងហោច មនុស្ស​៩នាក់ស្លាប់ និង​របួស​ជាង​៥០នាក់ នៅក្នុងការវាយប្រហារ​មីស៊ីល​របស់​រុស្ស៊ី។ គិត​ចាប់តាំង​ពី​ចូលធ្វើ​សង្រ្គាមឈ្លានពាន​អ៊ុយក្រែន នៅ​ថ្ងៃទី ២៤​កុម្ភៈ នេះជាលើកទី១ ដែល​កងទ័ព​រុស្ស៊ី បាញ់មីស៊ីល ក្នុង​ចម្ងាយ​ដ៏ឆ្ងាយ សំដៅ​មូលដ្ឋានទ័ព​អ៊ុយក្រែន ជាទី ដែល​​មាន​ការបណ្តុះបណ្តាល​កងទ័ព​បរទេស និង​កងទ័ព​អ៊ុយក្រែន សម្រាប់​បេសកកម្ម​ក្រុមមួកខៀវ​របស់​អង្គការ​សហប្រជាជាតិ។ រុស្ស៊ី​បាញ់មីស៊ីលសំដៅ​មូលដ្ឋានទ័ព​ដែល​មាន​ហេដ្ឋារចនាសម្ព័ន្ធទ័ពបរទេស​ក្នុងទឹកដី​អ៊ុយក្រែន។ នេះ​ជា​ការវិវត្ត​ដ៏គួរ​ឲ្យកត់សំគាល់ នៃ​សង្រ្គាមឈ្លានពាន​រុស្ស៊ី ​នៅអ៊ុយក្រែន។