តាំងពី​ថ្ងៃ​ចន្ទ ទី​១០​តុលា មហាសន្និបាត​អង្គការសហប្រជាជាតិ​បាន​បើក​កិច្ចប្រជុំ​វិសាមញ្ញ ដើម្បី​ជជែក​ពី ការកាត់យកទឹកដី​អ៊ុយក្រែន ចំនួន ៤​បន្ថែមទៀត​ពីសំណាក់រុស្ស៊ី។ មហាសន្និបាត​អង្គការ​សហប្រជាជាតិ​រៀបចំ​កិច្ចប្រជុំ​វិសាមញ្ញ នៅ​សប្តាហ៍នេះ បន្ទាប់ពី ក្រុមប្រឹក្សា​សន្តិសុខ​អង្គការ​សហប្រជាជាតិ បរាជ័យ មិនអាច​បោះឆ្នោត ចេញសេចក្តី​សម្រេច​ថ្កោលទោស រុស្ស៊ី ចំពោះ​ការកាត់យកទឹកដី​អ៊ុយក្រែន កាលពីដើមខែតុលា។ ម្យ៉ាងវាធ្វើឡើង​នៅចំថ្ងៃ​ដែល​រុស្ស៊ី​បានបាញ់មីស៊ីលយ៉ាង​សន្ធប់​ទៅលើ​ទីក្រុង​ធំៗ​របស់​អ៊ុយក្រែន ដោយ​បាន​សម្លាប់​ប្រជាជន​ស៊ីវិល​យ៉ាងតិច ១១នាក់​និង​របួស​ជិត ១០០នាក់។