ក្តីបារម្ភដែលថា រុស្ស៊ី​នឹងឈប់​លក់ បង្ហូរ​ឧស្ម័ន​ឲ្យអឺរ៉ុប​បាន​ក្លាយ​ជា​ការពិត។ នៅថ្ងៃ​សៅរ៍នេះ ក្រុមហ៊ុន​ឧស្ម័ន​រុស្ស៊ី Gazprom បានប្រកាសបិទ​បំពង់​បង្ហូរ​ឧស្ម័ន Nord Stream ១ ទៅ​កាន់អឺរ៉ុប ដោយ​លើក​យក​ហេតុផល ​ថា គេរក​ឃើញ​មាន​លេចហៀរ​ ប្រេង នៅ​ក្នុង​ទួរប៊ីន​របស់​បំពង់បង្ហូរប្រេង ក្នុងទឹកដី​រុស្ស៊ី។ តាមគម្រោង Gazprom ត្រូវ​បើក Nord Stream ១ ឲ្យ​ដំណើរការ​ឡើង​វិញ ក្នុង​ថ្ងៃ​សៅរ៍នេះ បន្ទាប់ពី​ប្រកាស​បើកការជួសជុល​ រយៈពេល​៣ថ្ងៃ។ រុស្ស៊ី ប្រកាសបន្ត​បិទ បំពង់ឧស្ម័ន​ទៅអឺរ៉ុប ១ ដោយ​គ្មានកំណត់។ វាកើតឡើង​នៅចំពេល​ដែល ក្រុមប្រទេស​មហាអំណាច​ឧស្សាហកម្ម G៧ ទើប​យល់ព្រមព្រៀងគ្នា​កាលពីថ្ងៃ​សុក្រម្សិលមិញ ឲ្យ​មាន​ការកំណត់ បញ្ចុះ​តម្លៃប្រេង ដែល​ទិញ ពីរុស្ស៊ី។