តុលាការក្រុងភ្នំពេញ​ បន្ត​លើក​ពេល​សវនាការ​លើ​អង្គសេចក្តី​នៃ​សំណុំរឿង​លោក​ រ៉ុង ឈុន ​និង​ក្រុមសកម្មជន​សង្គម​ជិត១០ផ្សេងទៀត​ ដែលគ្រោង​ធ្វើ​នៅថ្ងៃ​ទី៨ ខែមិថុនា ​ទៅពេល​ក្រោយ​ទៀត ​ក្រោម​ហេតុផល​បង្ការ​ជំងឺកូវីដ-១៩ ​។ ទោះជាយ៉ាងណា​ តុលាការក្រុងភ្នំពេញ​ ​នឹង​​បន្ត​បើក​សវនាការ​លើ​បណ្តឹង​​សុំនៅ​ក្រៅឃុំ​បណ្តោះ​អាសន្ន​របស់​លោក​ រ៉ុង ឈុន និង​កញ្ញា ​ស កណិការ ​ដូចការគ្រោងទុកដដែល។ សាច់ញាតិ ​និង​មេធាវី​ការពារក្តី​ ​ទាមទារ​ឲ្យតុលាការ​ដោះ​លែង​សកម្មជន​សង្គម​ទាំងនោះ​ ព្រោះ​ការលើក​ពេល​បើក​សវនាការ​លើអង្គ​សេចក្តី​ម្តង​ហើយ​ម្តងទៀតនេះ ​នឹងធ្វើឲ្យ​ពួកគាត់​ បន្តជាប់​ឃុំ​ក្នុង​ពន្ធនាគារ​ដោយ​អយុត្តិធម៌។