សង្គ្រាមឈ្លានពានរបស់រុស្ស៊ីនៅអ៊ុយក្រែន បានរុញច្រានប្រទេស​២នៅអឺរ៉ុបខាងជើង​ គឺហ្វាំងឡង់ និង​ស៊ុយអែត​ ដែលធ្លាប់តែស្ថិតនៅអព្យាក្រិត្យ មិនចូលបក្សសម្ព័ន្ធយោធាណាទាំងអស់នោះ ឲ្យងាក​មក​ចង់ ចូលជាសមាជិក​របស់អង្គការសម្ព័ន្ធមិត្តអាត្លង់ទិកខាងជើង ហៅកាត់ថាអូតង់ ឬណាតូ។ នៅថ្ងៃចន្ទទី១៦ឧសភានេះ សភា​របស់​ហ្វាំងឡង់ និង​​ស៊ុយអែត កំពុងតែបើកការប្រជុំពិភាក្សាគ្នា ដើម្បីអនុម័តបេក្ខភាពស្នើសុំចូល​ជាសមាជិក​អង្គការអូតង់​។ ដោយឡែក រុស្ស៊ីបានចាត់ទុកបំណងរបស់ហ្វាំងឡង់ និង​ស៊ុយអែត ដែល​ចង់ចូលជាសមាជិករបស់អូតង់នេះ ថាជារឿងយល់ខុសហើយ។ ទន្ទឹមគ្នានេះ តួកគី ដែលជាសមាជិកអូតង់ម្នាក់ដែរ​ បានបង្ហាញជំហរមិនគាំទ្របេក្ខភាពរបស់ហ្វាំងឡង់​ និង​ស៊ុយអែតទេ។