កម្ពុជា​គឺជា​ប្រទេស​តែ១គត់​ ដែល​មាន​ការ​តម្លើង​ប្រាក់ឈ្នួល​អប្បបរមា​លើវិស័យ​កាត់ដេរ​អំឡុង​ពេល​នៃវិបត្តិ​កូវីដ-១៩។​ តាម​កិច្ច​ពិភាក្សា​របស់​ក្រុមប្រឹក្សា​ជាតិ​ប្រាក់ឈ្នួល​អប្បបរមា​ចុងក្រោយ​កាលពី​ខែកញ្ញា​កន្លង​ទៅ​ ប្រាក់​ឈ្នួល​អប្បបរមា​នៃវិស័យ​កាត់ដេរ​សម្រាប់​ឆ្នាំ២០២២​ គឺ១៩៤​ដុល្លារ​ ពោល​គឺឡើង​២ដុល្លារ​ពីឆ្នាំចាស់។​ នៅក្នុង​ខណៈ​នេះ​ សេដ្ឋកិច្ច​កម្ពុជា​បាន​រើប​ឡើងវិញ​ក្រោយរង​ព្យុះកូវីដ​ ដោយ​រដ្ឋាភិបាល​រំពឹង​កាលពី​ពេល​ថ្មីៗ​នេះថា​ កំណើន​សេដ្ឋកិច្ច​កម្ពុជា​នឹងឡើង​ខ្ពស់​ជាង២,៤%។​ ហេតុដូច្នេះ​ហើយ​ ភាគី​សហជីព​ បាន​ទទូច​ថាការ​តម្លើង​ប្រាក់​ឈ្នួល​កម្មករ​វិស័យ​កាត់ដេរ​គួរត្រូវ​ពិចារណា​ឡើងវិញ​ បើទោះ​ណា​ជា​ប្រទេស​ឧស្សាហកម្ម​កាត់ដេរ​ឯទៀត​មិនមាន​ការតម្លើង​ប្រាក់ឈ្នួល​ ឡើង​តែ​កម្ពុជា​ក៏ដោយ។​