ឆ្លងកាត់ការពិភាក្សា និងការ​​តាក់តែង រយៈពេល​១ឆ្នាំកន្លះ ទីបំផុត សហភាពអឺរ៉ុបបានសម្រេច​អនុម័ត នៅថ្ងៃសៅរ៍ទី​២៣មេសា នូវច្បាប់ថ្មីមួយ ដែលមានខ្លឹមសារគ្រប់គ្រង​ភាពអាណាធិបតេយ្យ និងខុសច្បាប់ទាំងឡាយទាំងពួក ដែលមាន​នៅតាមបណ្តាញសង្គម និងតាមបណ្តាញអ៊ីនធ័រនិត​ជា​ទូទៅ​។ ក្រុមហ៊ុន​បច្ចេកវិទ្យាអ៊ីនធ័រនិត​ទាំងអស់ នឹងត្រូវគោរព​វិធានការច្បាប់ថ្មីរបស់អឺរ៉ុបនេះ  ដើម្បី​ប្រយុទ្ធប្រឆាំង នឹងការផ្សព្វផ្សាយ​ព័ត៌មានក្លែងក្លាយ ការឃោសនាញុះញង់អំពើហិង្សា ការផ្សព្វផ្សាយទំនិញក្លែងក្លាយ ព្រមទាំង​អំពើឆបោកនានា។ សហភាពអឺរ៉ុបអះអាងថា ច្បាប់ដ៏ធំរបស់ខ្លួន​នេះ គឺជាច្បាប់ដំបូងគេហើយក្នុងពិភពលោក ដែល​នឹងមកគ្រប់គ្រង ដាក់កាតព្វកិច្ចដ៏តឹងតែងលើបណ្តារក្រុមហ៊ុនបច្ចេកវិទ្យាធំៗទាំងអស់ ដែលពីមុនមកអាចធ្វើអ្វីបានតាមតែចិត្តនោះ។