តំណាង​អង្គការ​អន្តរជាតិ និង​សង្គម​ស៊ីវិល​ក្នុង​ស្រុក​បាន​បង្ហាញ​ក្ដី​ព្រួយបារម្ភ​ដំណាល​គ្នា​ពី​ភាព​យឺតយ៉ាវនៃ​ការ​បំបែក​អនីតិជន​ចេញ​ពី​អ្នកទោស​ទូទៅ បើ​ទោះបី​ច្បាប់​ស្ដី​ពី​យុត្តិធម៌​អនីតិជន​ត្រូវ​បាន​ដាក់​ឲ្យ​ប្រើប្រាស់តាំងពីឆ្នាំ២០១៦ក្ដី។ ភាព​យឺតយ៉ាវ​នេះ​ត្រូវ​បាន​ពួកគេ​មើល​ឃើញ​ថា ជា​ហេតុ​នាំ​ផល​មួយ​ធ្វើ​ឲ្យកំណើន​អ្នកទោស​មាន​ភាព​ចង្អៀត​ណែន​នៅ​តាម​ពន្ធនាគារ។ តែ​យ៉ាងណា​មិញ មន្ត្រី​នៃ​ក្រសួង​សង្គមកិច្ចឲ្យដឹងថា តាមគម្រោងនៅក្នុងឆ្នាំ២០២២នេះ អាជ្ញាធរ​នឹង​ដក​អនីតិជន​ប្រមាណ​៤០០នាក់ ពីពន្ធនាគារ​នានា​នៅ​ក្នុង​ប្រទេសកម្ពុជា យក​មកដាក់​ដោយឡែក​នៅ​មជ្ឈមណ្ឌល​ស្ដារនីតិសម្បទា​យុវជនស្ថិត​នៅ​ស្រុក​កណ្ដាល​ស្ទឹង ខេត្តកណ្ដាល។ ការញែក​បែបនេះ​បន្ទាប់ពី​កម្ពុជា ទើប​តែ​មាន​មជ្ឈមណ្ឌល​ស្ដារនីតិសម្បទា​អនីតិជន​ដែល​បាន​សម្ពោធ​ដាក់​ឲ្យ​ប្រើប្រាស់​កាល​ពី​ចុង​ឆ្នាំ២០២១។