នាវាចម្បាំង​រុស្ស៊ី​ឈ្មោះ MOSKVA បាន​លិច​ទៅ​ក្នុង​សមុទ្រ​ខ្មៅ​នា​ថ្ងៃ​ព្រហស្បតិ៍ ទី១៤ មេសា។ តែ​ការ​លិច​នេះ​មិន​បាន​បណ្តាល​ឲ្យ​បាត់បង់​មនុស្ស​ទេ ព្រោះ​មន្រ្តី​យោធា និង​ទ័ព​សរុប​ទាំង ៥០០នាក់​ត្រូវ​បាន​ជម្លៀស​ចេញ​មុន។ រីឯ​មូលហេតុ​នៃ​ការ​លិច​នេះ​ត្រូវ​បាន​រុស្ស៊ី​បញ្ជាក់​ថា គឺ​ដោយសារ​តែ​មាន​អគ្គិភ័យ​ឆាបឆេះ​នៅ​កន្លែង​ស្តុកអាវុធ ពោល​មិនមែន​ដោយសារ​ត្រូវ​គ្រាប់មីស៊ីល​អ៊ុយក្រែន​ទេ។ តែ​អ៊ុយក្រែន​បាន​បន្ត​បញ្ជាក់​ថា MOSKVA បាន​ត្រូវ​គ្រាប់មីស៊ីល​របស់​ខ្លួន។ ព្រឹត្តិការណ៍​មួយ​នេះ​បាន​ធ្លាក់​មក ខណៈ​ដែល​សង្រ្គាម​រុស្ស៊ី​ឈ្លានពាន​អ៊ុយក្រែន​បាន​ឈាន​ចូល​ដល់ ៥១ថ្ងៃ​នៅ​ថ្ងៃ​សុក្រ ទី១៥ មេសា។