កិច្ចចរចា​រវាង​ភាគី​អ៊ុយក្រែន និង​រុស្ស៊ី​ក្នុង​ប្រទេស​តួកគី​បាន​បិទបញ្ចប់​នៅ​ថ្ងៃ​អង្គារ ទី២៩ មីនា។ ប្រធានាធិបតី​អ៊ុយក្រែន​លោក​ហ្សេឡេនស្គី​បាន​បញ្ជាក់​នៅ​ក្នុង​សារ​វីដេអូ​មួយ​ថា មាន​សញ្ញា​វិជ្ជមាន​មួយ​ចំនួន​នៅ​ក្នុង​កិច្ចចរចា​រយៈពេល ២ថ្ងៃ។ តែ​លោក​ហ្សេឡេនស្គីន​បាន​បន្ថែម​ថា សញ្ញា​វិជ្ជមាន​នេះ​មិន​បាន​បំភ្លេច​សំឡេង​ផ្ទុះ​ដោយ​គ្រាប់បែក និង​គ្រាប់មីស៊ីល​រុស្ស៊ី​ទេ។ សញ្ញា​វិជ្ជមាន​មួយ​ទៀត គឺ​ការ​ប្រកាស​របស់​រុស្ស៊ី​ពី​ការ​កាត់​បន្ថយ​ចំនួន​ទ័ព​ក្នុង​បរិមាណ​ច្រើន​ពី​ទីក្រុង​កៀវ និង​ទីក្រុង​ឆែនីហ្គីវ។ តែ​ទោះ​ជា​យ៉ាង​នេះ​ក្តី អ៊ុយក្រែន និង​ក្រុម​ប្រទេស​លោកខាងលិច​សម្តែង​ការ​ប្រយ័ត្នប្រយែង​ដោយ​គេ​រង់ចាំ​មើល​នា​ពេល​ខាង​មុខ។