សន្និសីទអន្តរជាតិ​​ស្តីពីមហាសមុទ្រ ដែលត្រូវបាន​រៀបចំឡើងនៅទីក្រុងលីសបូន ប្រទេសព័រទុយហ្កាល់ បានបិទបញ្ចប់ទៅកាលពីថ្ងៃសុក្រ ទី១កក្កដា។  មហាសមុទ្រដែលមានតួនាទីសំខាន់បំផុត ដល់អាយុជីវិតរបស់​មនុស្សជាតិយើង ហើយ​បច្ចុប្បន្ននេះមហាសមុទ្រ កំពុងតែមានសុខភាពទ្រុឌទ្រោម ខូចគុណភាព មិនអាច​បំពេញ​តួនាទីដ៏សំខាន់របស់ខ្លួនបាន​។ ឆ្លងកាត់ការជជែកពិភាក្សាគ្នា រវាងតំណាងរដ្ឋាភិបាល​ជាង​១៩០​ប្រទេស និង​ក្រុមអ្នកជំនាញ​ អស់រយៈពេល​៥ថ្ងៃមក​នេះ គេឃើញថា មានក្តីសង្ឃឹមច្រើន នៅក្នុុង​ការ​ឈានទៅកំណត់​វិធានការ ដើម្បីការពារ និង​ស្រោចស្រង់ ប្រព័ន្ធជីវចម្រុះនៃមហាសមុទ្រ។