សន្និសីទ​អន្តរជាតិ​ស្ដីពី​ជីវចម្រុះ COP១៥ បើក​ធ្វើ​នៅ​ក្នុង​ទីក្រុង​ម៉ុងរ៉េអាល់ ប្រទេស​កាណាដា​រយៈពេល ២សប្តាហ៍​ដោយ​ចាប់​ផ្តើម​ក្នុង​ថ្ងៃ​ពុធ ទី៧ ធ្នូ​រហូត​ដល់​ថ្ងៃទី១៩ ធ្នូ។ មាន​ជាង ១៩០ប្រទេស​ចូលរួម​នៅ​ក្នុង​សន្និសីទ​អន្តរជាតិ​មួយ​នេះ ហើយ​ក្នុង​រយៈពេល ២សប្តាហ៍ ក្រុម​អ្នក​ចរចា​ត្រូវ​រក​ឲ្យ​បាន​នូវ​កិច្ចព្រមព្រៀង​មួយ​ឲ្យ​ខាន​តែ​បាន បើ​មនុស្សជាតិ​មិន​ចង់​ឃើញ​ពូជសត្វ និង​រុក្ខជាតិ​រលាយ​ផុត​ពូជ​ពី​ផែនដី​របស់​យើង​ទេ។ សម្រាប់​អង្គការសហប្រជាជាតិ COP១៥ ជា​សំណាង​ចុង​ក្រោយ និង​ជា​ប្រវត្តិសាស្រ្ត​សម្រាប់​មនុស្សជាតិ។