Umsjón: Pálmi Jónasson

Tvö félög sem norski bankinn DNB taldi tengjast Samherja voru metin í hættu á að vera nýtt í peningaþvætti. Þetta kemur fram í nýjum gögnum WikiLeaks.

Þorsteinn Már Baldvinsson, sem hætti tímabundið sem forstjóri Samherja eftir umfjöllun Kveiks og Stundarinnar um Samherjaskjölin, er hættur í stjórn tveggja breskra sjávarútvegsfélaga.

Namibíski herinn er í viðbragðsstöðu vegna kosninganna þar. Slæmt efnahagsástand og uppljóstranir í Samherjaskjölunum um spillingu hafa valdið óánægju í Namibíu.

Tveir ráðherrar í ríkisstjórn Möltu og náinn samstarfsmaður forsætisráðherrans sögðu af sér í dag. Lögregla hefur hert á rannsókn á morði blaðakonunnar Daphne Galizia fyrir tveimur árum.

Ólafur Þór Hauksson, héraðssaksóknari, segir að fjölga verði starfsmönnum á rannsóknarsviði embættisins um sex að lágmarki.

Af hverju máttum við ekki skrá okkur í sambúð? Spyrja systurnar Oddrún Vala og Ragnheiður Gyða Jónsdætur. Þær hafa rekið saman heimili í hartnær þrjátíu ár og ólu dóttur Ragnheiðar upp í sameiningu. Eru gild rök fyrir því að skylt fólk megi ekki búa saman og njóta sömu réttinda og óskyld hjón eða pör? Þarf að endurskoða hvernig við hugsum um fjölskyldur? Spegillinn kíkti í heimsókn til systranna, ræddi við þær um sambúðina sem ekki má skrá hjá Þjóðskrá og fékk álit lögfræðiprófessors. Arnhildur Hálfdánardóttir ræddi við Oddrúnu Völu og Ragnheiði Gyðu Jónsdætur og Hrefnu Friðriksdóttur.

Ólafur Þór Hauksson, héraðssaksóknari segir að fjölga verði starfsmönnum á rannsóknarsviði embættisins að lágmarki um sex um áramótin, helst átta. Þetta kemur fram í minnisblaði Ólafs Þórs til dómsmálaráðuneytisins sem fréttastofa fékk afhent. Rætt við Ólaf Þór í Speglinum.

Hvalir binda meira af koldíoxíði en regnskógarnir og hjálpa til við framleiða um helming af súrefni jarðarinnar. Hópur vísindamanna heldur því fram að ef hvalir eru verndaðir og þeim fjölgað gætu þeir gegnt mikilvægu hlutverki í að eyða gróðushúsalofttegundum. Þetta kemur fram í grein í veftímaritinu Fjármál og þróun sem er vefmiðill á vegum Alþjóðagjaldeyrissjóðsins. Arnar Páll Hauksson sagði frá í Speglinum.