Spegillinn 28. október 2019

Umsjón: Kristján Sigurjónsson

Tæknimaður: Magnús Þorsteinn Magnússon

Sjaldgæft er að ráðuneyti vísi málum til áfram til lögreglu eins og í Samherja- og Seðalabankamálinu, segir lögfræðilektor.

Slökkviliðsmenn hafa stjórn á einungis fimm prósentum gróðureldanna sem brenna í Kaliforníu. 27 þúsund hektarar eru sviðin jörð. Yfir 180 þúsund íbúum Sonoma-sýslu hefur verið skipað að forða sér að heiman.

Kjaradeila sveitarfélaganna og Starfsgreinasambandsins er komin í alvarlegan hnút, segir framkvæmdastjóri sambandsins.

Fylgi stjórnarflokkanna hefur minnkað frá kosningum fyrir tveimur árum samkvæmt fylgiskönnun Gallups. Rúmlega helmingur landsmanna styður ríkisstjórnina þegar kjörtímabilið er hálfnað.

Fullyrt er að lágmarks mánaðarlaun félagsmanna í 5 BHM félögum sem sömdu í síðustu viku verði 500 þúsund í lok samningstímans og að samningurinn tryggi kaupmáttaraukningu.

Slökkviliðsstjóri höfuðborgarsvæðisins segir góða reykskynjara brýnustu eldvörnina. Eldsvoðar hafa verið tíðir í heimahúsum að undanförnu.

Gengi hlutabréfa í Icelandair hækkaði um rúm 11 prósent í liðlega hundrað milljón króna viðskiptum í kauphöllinni í dag.

Tveir læknar til viðbótar hafa sagt upp störfum á Reykjalundi og hafa nú sjö læknar sagt upp störfum í mánuðinum í kjölfar uppsagnar forstjóra og framkvæmdastjóra lækninga.

Vegagerðin varar við því að færð geti orðið erfið í nótt og fyrramálið því búast megi við frostrigningu með glerhálku á Suðurlandi, á hringveginum milli Hveragerðis og Hellu og ekki síður í uppsveitum. Á Höfuðborgarsvæðinu rignir seint í kvöld og verður sums staðar ísing, en hlýnar í fyrramálið.

Lengri umfjallanir:

Það er óhætt að segja að heimildamyndaröðin Svona fólk sem sýnd var á RÚV síðastliðin fimm sunnudagskvöld hafi vakið verðskuldaða athygli. Svona fólk fjallar um mannréttindabaráttu homma og lesbía, hinsegin fólks, hér á landi síðastliðin rúm 40 ár, frá því að samtökin 78 voru stofnuð. Erfiðleikana og fordómana sem mættu þeim í upphafi, sigra og og ósigra, gjörbreytingu á viðhorfi þjóðarinnar um miðjan tíunda áratuginn, réttarbætur löggjafans, tregðu þjóðkirkjunnar til að viðurkenna fullan rétt samkynhneigðra og í lokin klofning og sárindi í samfélagi þeirra sem enn hafa ekki gróið. Höfundur myndarinnar er Hrafnhildur Gunnarsdóttir. Hún vann að henni í 26 ár. Kristján Sigurjónsson talar við Hrafnhildi.

Fullyrt er að lágmarks mánaðarlaun félagsmanna í 5 BHM félögum sem sömdu í síðustu viku verða 500 þúsund í lok samningstímans. Samningurinn á að tryggja kaupmáttaraukningu.