Vullis- en veral plastiek -besoedeling is besig om die land se finansies uit te put en om die land letterlik te verswelg. Dit is die waarskuwing van 'n kenners in die gebied. Prof Henk Bouwman van die departement van biologiese wetenskappe van die Noordwes Universiteit sê alhoewel mense al meer bewus raak van die impak van plastiek besoedeling is dit amper te laat om nou enige iets daaromtrent te doen

Die voormalige hoof van die batestuursfirma Belvedere dagvaar die joernalis Alec Hogg. Dit volg na Belvedere en hul fondse vernietig is toe David Marchant van Offshore Alert in Amerika gesê het Cobus Kellerman bedryf 'n Ponzi-skema. Marchant en Hogg het dit die grootste Ponzi-skema nog ooit genoem. Intussen is alle ondersoeke teen Kellerman gestaak. Izak du Plessis het aan hom gevra hoekom hy Hogg wil dagvaar.

'n Navorsings professor by die Education and Human rights diversity navorsingseenheid by die NWU se Potchefstroom kampus, Elda de Waal sê die Gautengse departement van onderwys kon die situasie by Hoërskool Overvaal verhoed het. De Waal sê dit wil amper voorkom of die departement met opset die onmin stook.

Die Suid-Afrikaanse Nasionale Weermag sê hulle doen alles in hulle vermoeë om sindikate wat gesteelde voertuie oor die land se grense smokkel, te stuit. Dit volg na 'n groep soldate van 14 Suid-Afrikaanse Infanterie Bateljon oorsprongklik van Umtata in die Oos kaap, 'n sindikaat op die grens tussen Mosambiek en Suid-Afrika voorgelê het. Majoor Carl Fuller sê die geskatte waarde van die voertuie is sowat twee en 'n half miljoen rand..

'n Ses-jarige meisie van Ballito in KwaZulu-Natal, sterk goed aan, nadat 'n Mosambiekse spoegkobra haar in haar bed gebyt het. Mikayla Grove se ouers was buite toe hulle haar hoor skreeu vanuit haar kamer. Toe haar ma, Inge by haar kom het sy gekla oor tandpyn, waarna sy die kobra 'n paar sentimeter van die bed gewaar het. Die slang het toe Inge in die oë gespoeg, maar sy kon dit met water uitwas. Johan Marais van die African Snake Bite Institute sê Mikayla was binne 15 minute by die hospitaal, waar sy onmiddellik behandeling ontvang het.

Johan Marais van die African Snake Bite Institute sê daar word tans meer slangbyte deur die sytand-slang, beter bekend as die Stilletto snake, aangemeld. Marais sê daar is nie teengif vir die slangbyt nie.

Een van sub-Sahara Afrika se gewildste voorbehoedmiddels kan vroue se risiko om met die MIV-virus besmet te word, met tot veertig persent verhoog. Die bevindinge is gemaak in 'n onlangse hersiening-studie, waarvan die Universiteit van Kaapstad deel was. Joan-Marie Verhoef berig.

'n Luisteraar van RSG, Sanet Byrne van Robertson in die Wes-Kaap,vertel aan Spektrum hoe haar voertuig met 'n baksteen gegooi is.

'n Vragmotorbestuurder het glo gisteraand 'n botsing veroorsaak op die R512 naby Lanseria in Gauteng, in 'n poging om mense wat sy voertuig met klippe gooi, te vermy. Die klippe het sy windskerm getref en sy sig belemmer, waarna hy glo probeer wegjaag het. Besonderhede oor die voorval is nog vaag. Die polisiewoordvoerder, Luitenant Kolonel Lungelo Dlamini sê hulle is nog nie bewus van die voorval nie.

Suid-Afrikaanse kunstenaars het met 'n Facebook-veldtog teen kopieregskending begin. As deel van die veldtog neem hul profielfoto's van hulself terwyl hulle 'n kwas vasbyt. Honderde kunstenaars het hierdie week gehoor aan die oproep gegee. Izak du Plessis berig