Terwyl die bekgeveg tussen die poskantoor en die vakbonde oor salarisse voortduur, raak die publiek se frustrasie net groter. 'n Groep uitgewers van spesialistydskrite het vandag die tenderproses geopen vir maatskappye om hulle tydskrifte by lesers af te lewer. Die poskantoor het, volgens wet, die alleenreg om pos te versprei in die land. Chris Yelland van EE Uitgewers en woordvoerder van die groep, sê in hierdie geval is daar egter 'n uitsondering.

Die Suid-Afrikaanse Poskantoor sê stakende werkers kan noodgedwonge afgedank word, omdat 'n geldige stakingsertifikaat nog nie ontvang is nie. Die poskantoor se adminstrateur, Simo Lushaba, het ook in 'n mediaverklaring gesê dat daar reeds 'n ooreenkoms met die South African Postal Allied Workers Union en die Demokratiese Pos en Kommunikasiewerkersvakbond bereik is. Onderhandelinge met die Kommunikasie Werkersvakbond (CWU) het egter weer op 'n dooiepunt uitgeloop. Die president van die CWU, Clyde Mervin, sê hulle is oorbluf deur die poskantoor se arrogante optrede.

Dit is vandag is Wêreld Kinderdag. Die besluit om 'n so 'n dag op sy te sit vir kinders, is die eerste keer bespreek by 'n wêreldkonferensie oor die welstand van kinders, wat in 1925 gehou is.

'n Suid-Afrikaanse wynlandgoed is een van sewe wynplase in die wêreld wat met Great Wine Capitals (GWC) se Best of Wine-toekenning bekroon is. Die GWC is 'n netwerk van die voorste wynproduserende streke ter wêreld, en is geskep om internasionale beste praktyk in wyntoerisme te bevorder. Die Waterford-wynlandgoed by Stellenbosch is lank reeds bekend vir hulle volhoubare wingerdboukunde en wynmaaktegnieke, en is daarom as die wenner in sy streek aangewys. Die bemarkingsbestuurder van Wines of South Africa, Andre Morgental, sê dit is nie die eerste keer dat Waterford met die titel wegstap nie.

Suid-Afrika is nie die enigste land ter wêreld wat gratis behuising aan arm mense binne sy landsgrense verskaf, soos wat pres. Jacob Zuma beweer nie. Tydens 'n toespraak waar die president onder andere Suid-Afrikaners as lui bestempel het, terwyl buitelanders geleenthede sien en aangryp, het hy ook die stelling gemaak. Hy het selfs die uitdaging gerig dat enige iemand hom verkeerd moet bewys daaroor. Africa-Check het die uitdaging aanvaar en na deeglike navorsing bevind dat die stelling nie waar is nie. Die adjunkredakteur van Africa-Check, Anim van Wyk, sê dit is belangrik dat Suid-Afrikaners self die waghond in hulle gemeenskappe speel.

Die Proteas is nou die wêreld se nommer een eendagkrieketspan, maar ondersteuners wonder steeds of hulle die druk sal kan hanteer in volgende jaar se Wêreldbeker. Navorsing in die VSA werp nou lig op die vraag waarom sekere sportlui nie druk kan hanteer nie. Izak du Plessis praat met ons wetenskapkorrespondent, George Claassen, oor die bevindings, en of daar oplossings is om AB de Villiers se span se probleme onder druk te oorkom.

Spektrum het met Petronella Nieuwoudt van CARE FOR WILD geskakel om te hoor hoe dit met die klein renosterkalfie, Wyntir, gaan. Weens die sensitiewe aard van die situasie word die presiese ligging van die sentrum en hoeveel diere daar versorg word, geheim gehou. Neuwoudt het 'n vinnige onderhoud aan Spektrum toegestaan terwyl sy besig was om nog 'n renosterkalf te ontvang, wat in 'n kritieke toestand is nadat stropers haar met pangas op die neus gekap het om haar weg te hou van haar ma.

Die jongste syfers van die Departement van Omgewingsake wys dat daar vanjaar reeds 899 renosters in Suid-Afrika gestroop is. Dit is 'n geveg op verskeie fronte. Terwyl die regering intelligensie insamel en stropers konfronteer, moet iemand ook omsien na klein renosterkalfies wat wees gelaat word as gevolg van die stropery.

'n Groep bose, gewapende narre wat mense terroriseer. Dit klink soos iets uit 'n riller, maar dis wat in Frankryk aan die gebeur is. Die Franse polisie het al verskeie jongmense in hegtenis geneem wat 'n skrikbewind, geklee in narpakke, voer.

Kinderregte-aktiviste is woedend oor wat aangevoer is ter strafversagting van 'n veroordeelde kinderverkragter. Die verkragter, Mathys van Zyl, se regsverteenwoordiger het in die Palm Ridge Landdroshof in Johannesburg gesê die verkragting van 'n driejarige dogtertjie is nie so ernstig nie, omdat dit met 'n volwasse man se vinger, en nie sy penis gedoen is nie.