Spektrum

Die Suid-Afrikaanse Vloot het net een vaartuig tot sy beskikking. Sy vyf duikbote kan nie gebruik word nie, terwyl die vyf patrollie-vaartuie ook stukkend is. Nie een van die vier duikspanne is op standaard nie. Dié inligting is in die Parlement bekendgemaak tydens  vrae aan die Minister van Verdediging, Angie Mothsekga. Ons praat nou hieroor met Prof Abel Esterhuyse van die Fakulteit Krygskunde aan die Universiteit van Stellenbosch. 

Naweek Aktueel het eergister berig dat die inwoners van Westbury, Johannesburg beweer dat daar in dié woonbuurt, sedert die begin van die jaar, meer as 70 mense in vermeende bende-geweld gesterf het. Die polisie kon egter nog nie dié inligting bevestig nie. Intussen bly die situasie op die Kaapse Vlakte GESPANNE, ná verskeie bende-verwante voorvalle die afgelope twee weke. Vir meer konteks hieroor, praat ons nou met die voorsitter van die parlement se portefeulje komitee oor Polisie, Ian Cameron.

Die Departement van Basiese Onderwys sê meer as R200 miljoen is bestee aan die druk van matriekvraestelle. Honderde onwettige mynwerkers is steeds ondergronds in Stilfontein, sonder kos en water. Die president van Suid-Afrika se sokkerfederasie, Danny Jordaan, is in hegtenis geneem.