តុលាការធម្មនុញ្ញថៃ នៅថ្ងៃពុធទី ១៤សីហា បានចេញសាលក្រមទម្លាក់លោកសេដ្ឋា ថៈវីស៊ីន ចេញពីមុខតំណែងនាយករដ្ឋមន្រ្តី។ ការណ៍នេះបានញ៉ាំងឲ្យមានការជជែកវែកញែកពីទំនាក់ទំនងកម្ពុជា-ថៃ ដែលជាប្រទេសជិតខាង។ នៅគ្រា ដែលលោកកាន់តំណែងជានាយករដ្ឋមន្ត្រីថៃ កាលពីឆ្នាំទៅ លោក សេដ្ឋា ថៈវីស៊ីន ធ្លាប់បានមកបំពេញទស្សនកិច្ចជាផ្លូវការនៅកម្ពុជា លោក សេដ្ឋា ធ្លាប់សន្យាជាមួយនាយករដ្ឋមន្ត្រីកម្ពុជា ជុំវិញការមិនអនុញ្ញាតឲ្យមានកម្លាំងប្រឆាំង ឈរជើងលើទឹកដីថៃ។ នៅក្នុងអំឡុងទស្សនកិច្ចរបស់លោកសេដ្ឋា នៅកម្ពុជា  នាយករដ្ឋមន្ត្រីរបស់ប្រទេសទាំងពីរនៅបានសន្យាពង្រីកទំហំសេដ្ឋកិច្ច និងទំនាក់ទំនងទ្វេភាគីបន្ថែមទៀត។ ដូច្នេះ តើការដកលោកសេដ្ឋា ថៈវីស៊ីនចេញពីតំណែងនាយករដ្ឋមន្រ្តី ការប្រែប្រួលស្ថានការណ៍នយោបាយផ្ទៃក្នុងរបស់ថៃ នឹងជះឥទ្ធិពលបែបណាទៅលើអនាគតទំនាក់ទំនងកម្ពុជា ថៃ?