Þjóðmál

Andrés Magnússon og Stefán Einar Stefánsson fara yfir það helsta fyrir helgina. Við ræðum meðal annars um framboðsmál flokkanna í Reykjavík, nauðvörn ríkisstjórnarinnar vegna þrálátrar verðbólgu, þvermóðskuna við frumvarp um hækkun bóta umfram laun sem allir málsmetandi aðilar vara við, formannskjör í Framsóknarflokknum, fyrirhugaðan sykurskatt, liðugasta bóndann á Íslandi, sölu Valhallar, deilur á Bifröst og margt fleira.

Freyr Friðriksson, stofnandi Kapp, lét nýlega af störfum sem forstjóri félagsins og er nú starfandi stjórnarformaður. Yfir heitum kaffibolla ræðir Freyr um uppgang félagsins og starfsemi, samruna við önnur félög, mikilvægi þess að hér sé starfandi öflugur sjávarútvegur til að styðja við frekari nýsköpun og tækniþróun, samskiptin við stjórnvöld og viðhorf stjórnvalda til atvinnulífs og verðmætasköpunar, starfsemi félagsins erlendis og margt fleira.

Brynjar Níelsson og Jens Garðar Helgason fara glaðir með okkur inn í helgina. Við ræðum um stöðu Seðlabankans sem hélt vöxtum óbreyttum í vikunni, stöðu ríkisstjórnarinnar sem er búin að missa tökin á verðbólgunni og ríkisfjármálunum, stöðuna í hagkerfinu, hvað er framundan í stjórnmálunum og margt fleira.

Ingvi Þór Georgsson og Konráð Guðjónsson ræða um flókna stöðu hagkerfisins, upplýsingaóreiðuna um ástæður þrálátrar verðbólgu og hver hinn raunverulegi sökudólgur kann að vera, hvort einhverjar líkur sé á vaxtalækkunum í bráð, misreikning í áætlunum stjórnvalda og fleira í þeim dúr. Þá fjöllum við einnig um nýlegt dæmi um það hvernig Evrópusambandið tók snúning á Írlandi við kvótaúthlutun innan sambandsins og loks ólíkt viðhorf kynslóða til vinnumarkaðarins.

Þórður Gunnarsson og Örn Arnarson ræða um það sem skiptir þjóðina mestu máli um þessar mundir, handbolta. Þá er einnig rætt stuttlega um prófkjör og leiðtogaprófkjör, hvernig nýr oddviti Samfylkingarinnar hagnaðist bara alveg óvart af lóðabraski, þráláta verðbólgu í boði ríkisstjórnarinnar og komandi vaxtaákvörðun Seðlabankans, ráðherra sem er ósammála staðreyndum, stöðuna í hagkerfinu, mikilvægi loðnuvertíðar, baráttuna við útvarpsgjaldið, hrós vikunnar og margt fleira.

Björn Ingi Hrafnsson ræðir um nýafstaðið prófkjör Samfylkingarinnar í Reykjavík og hvað afleiðingar það kann að hafa, ólíka stöðu annarra flokka í aðdraganda sveitastjórnarkosninga, umræðu um alþjóðmál og margt fleira sem snýr að stjórnmálunum þessa dagana.

Vilhjálmur Árnason og Þorsteinn Víglundsson fara yfir fréttir vikunnar á bóndadegi. Við ræðum um nýjustu vendingar í baráttunni um Grænland, væntanlegt prófkjör Samfylkingarinnar í Reykjavík, ástæðu þess að Þorsteinn sagði skilið við Viðreisn og almennt um stjórnarsamstarfið, þróun á fylgi flokkanna, hvernig Össur Skarphéðinsson skólaði Sigmar Guðmundsson til, stöðuna í efnahagsmálum, framboð Þorsteins til formennsku í Samtökum iðnaðarins, framboð Vilhjálms í oddvitasæti hjá Sjálfstæðisflokknum í Keflavík og margt fleira.

Andrea Sigurðardóttir og Andrés Magnússon frá Morgunblaðinu ræða um allt það helsta sem er að eiga sér stað í stjórnmálunum þessa dagana. Við ræðum um óvænta afsögn þingmanns Viðreisnar og hvort að til staðar séu ósagðar fréttir í því máli, átök innan Samfylkingarinnar í Reykjavík, undarlega uppákomu við kynningu á nýju vinstri framboði í Reykjavík, leit Miðflokksins að oddvita, hvort það verði einhver endurnýjun á lista Sjálfstæðisflokksins í Reykjavík, um oddvitaslagi víða um land í aðdraganda sveitastjórnarkosninga, undarlega tilfærslu málaflokka á milli ráðuneyta, tilraun leiðtoga ríkisstjórnarinnar til að setja Ísland í skotlínu Bandaríkjaforseta, mögulega löggjöf í áfengismálum og margt fleira.

Hörður Ægisson og Þórður Pálsson ræða um stöðuna í hagkerfinu og horfurnar framundan, heimatilbúin vanda af hálfu ríkisstjórnarinnar sem viðheldur verðbólgu og háum vöxtum, af hverju Seðlabankinn skilar auðu í gagnrýni á aukin útgjöld ríkisins, um gildishlaðin ummæli nýs félagsmálaráðherra um Seðlabankann og efnahagsmálin, um heimsókn Maríönu Mazzucato hingað til lands, nýja stjórn Íslandsbanka og sviptingar í fjármálageiranum, vantraust á deildarforseta viðskiptadeildar á Bifröst, áhrif Bandaríkjanna á Grænlandi og margt fleira.

Sigurður Már Jónsson ræðir um stöðuna í Venesúela og í Íran, um aðkomu Bandaríkjanna að þessum tveimur ríkjum og svæðunum í kringum þau, hvort við séum að horfa á einhverja breytta heimsmynd eða hvort að sagan sé að einhverju leyti að endurtaka sig, hvernig næstu skref kunna að verða og fleira í þeim dúr. Þá ræðum við einnig um pólitíkina hér heima, um hvort og þá hvernig verðbólgan kann að hafa áhrif á stjórnmálin og margt fleira.