នៅព្រឹក​ថ្ងៃទី​៣០​ ខែ​មករា​ ឆ្នាំ​២០២៤​ សាលា​ឧទ្ធរណ៍​បានបើក​សវនាការ​លើបណ្តឹង​ជំទាស់​របស់​លោក​ កឹម សុខា ​ប្រធាន​អតីត​គណបក្ស​សង្គ្រោះជាតិ​។ ​គួររម្លឹកថា​កាលពី​ជិត​ ១​ឆ្នាំ​មុន ពោលគឺ​ក្នុងថ្ងៃ​ទី​៣ ​ខែ​មករា ​ឆ្នាំ២០២៣ ​លោក កឹម សុខា ​ត្រូវបាន​សាលាដំបូង​រាជធានី​ភ្នំពេញ​ផ្តន្ទាទោស​ដាក់ពន្ធនាគារ​ចំនួន ​២៧ឆ្នាំ ​ដោយ​ឃុំនៅ​ក្នុងផ្ទះ ​ព្រមទាំង​ដកហូត​សិទ្ធិ​នយោបាយ​ទាំងអស់​។ ការ​លើកយក​សំណុំរឿង​សន្ទិដ្ឋិភាពលោក ​កឹម សុខា​ ទៅជំនុំជម្រះ​ដោយសាលា​ឧទ្ធរណ៍​ពេលនេះ​ នៅមិនទាន់​ដឹង​លទ្ធផល​ចុងក្រោយ​យ៉ាងណាទេ​។ ក៏ប៉ុន្តែ​អ្នកវិភាគ​នានា​បានមើលឃើញ​ច្រកចេញ ​ឬ​សេណារីយ៉ូ​នយោបាយ​ផ្សេងៗ​គ្នា​ដោយ​ខ្លះថា ​ទំនងមិនខុស​ពី​តុលាការ​ជាន់ទាប ​និង​ខ្លះទៀត​យោងលើ​ទិដ្ឋភាព​ជាក់ស្តែង​នៃច្បាប់ ​និង​នយោបាយ​កម្ពុជាសព្វថ្ងៃ​។ ​លោក ឯម សុវណ្ណារ៉ា ​សាស្ត្រាចារ្យ​ផ្នែកវិទ្យាសាស្ត្រ​នយោបាយ​មើលឃើញថា​សវនាការ​លើសំណុំរឿង​លោក កឹម សុខា ​ទំនងជា​មិនមានអ្វី​ប្រែប្រួល​ពីអ្វី​ដែល​បានធ្វើឡើង​ដោយ​តុលាការ​ជាន់ទាបទេ​។