នៅក្នុង​វេទិកា​ធុរកិច្ច​កម្ពុជា-បារាំង​លើកទី​២ នាថ្ងៃ​ទី​០៨ ខែ​កក្កដា ​ឆ្នាំ​២០២៤ ​លោក​នាយក​រដ្ឋមន្ត្រី​ ហ៊ុន ម៉ាណែត​ បានលើកឡើង​ថា​ប្រទេសកម្ពុជា​ទទួលបាន​ការ​វិនិយោគ​ផ្ទាល់​ពី​បរទេស​ច្រើន​ជាងគេ​នៅ​អំឡុងទសវត្សរ៍​ចុងក្រោយ​ក្នុង​ចំណោម​ប្រទេស​ដែលមាន​ការ​អភិវឌ្ឍន៍​តិចតួច​។ ​ជាក់ស្តែង​ក្នុងឆ្នាំ ​២០២៣ ​ក្រុមប្រឹក្សា​អភិវឌ្ឍ​កម្ពុជា​បាន​អនុម័ត​លើ​គម្រោង​វិនិយោគ​ចំនួន​២៦៨​ ដែលមាន​ទំហំ​ទឹកប្រាក់​ជិត ​៤,៩​ពាន់លាន​ដុល្លារ​។ អ្នកជំនាញ​សេដ្ឋកិច្ច​នានា​មើលឃើញ​ថា នេះជា​សញ្ញាវិជ្ជមាន​មួយ​សម្រាប់​កំណើន​សេដ្ឋកិច្ច​កម្ពុជា ​តែវា​ក៏មិនមែន​ជា​ហេតុផល​តែមួយគត់​នោះដែរ​។