ប្រមុខ​រដ្ឋាភិបាល​កម្ពុជា កាល​ពី​ចុង​សប្តាហ៍​មុន បាន​បញ្ជា​ឲ្យ​ស្ថាប័ន​ពាក់ព័ន្ធ ដឹកនាំ​ដោយ​រដ្ឋមន្ត្រី​ក្រសួង​រៀបចំ​ដែនដី នគរូបនីយកម្ម និង​សំណង់ ចុះ​ទៅ​ស្រាវជ្រាវ និង​បង្ក្រាប​អ្នក​ទន្រ្ទាន​យក​ដី​ដោយ​ខុស​ច្បាប់​នៅ​តំបន់​ព្រៃ​លិច​ទឹក​បឹង​ទន្លេ​សាប។ ក្នុង​អំឡុង​ពេល​នៃ​ការ​ស្រាវជ្រាវ​យ៉ាង​សកម្ម​ប៉ុន្មាន​ថ្ងៃ​កន្លង​ទៅ​នេះ មាន​មន្ត្រី​មួយ​ចំនួន បាន​ចេញ​មក​សារភាព ហើយ​ប្រគល់​ដី​ព្រៃ​លិច​ទឹក​ជា​ច្រើន​រយ​ហិចតា​ឲ្យ​រដ្ឋ​វិញ​។ ការ​ប្រគល់​ដី​ឲ្យ​រដ្ឋ​វិញ ដោយ​មិន​ឃើញ​មាន​ការ​ដាក់​ពិន័យ ទោស​ទណ្ឌ តាម​អំណាច​ច្បាប់​នេះ បាន​រង​នូវ​ការ​រិះគន់​ពី​សំណាក់​អង្គការ​សង្គម​ស៊ីវិល​នានា​ជា​បន្ត​បន្ទាប់​។