គណបក្ស​ភ្លើងទៀន​ ដែល​ជា​គណបក្ស​ប្រឆាំង​ដ៏​ធំ​មួយ​នៅ​កម្ពុជា​ មិន​បាន​ចូលរួម​ការ​បោះឆ្នោត​ជ្រើសតាំង​តំណាង​រាស្រ្ត ​នីតិកាល​ទី៧​ ឆ្នាំ​២០២៣​នេះ​ឡើយ​ ដោយសារ​តែ​គណៈ​កម្មាធិការ​ជាតិ​រៀបចំ​ការ​បោះឆ្នោត​ (គ.ជ.ប)​ បដិសេធ​មិន​ទទួល​យក​​ការ​ចុះ​បញ្ជី ​ខណៈ​ក្រុម​ប្រឹក្សាធម្មនុញ្ញ​វិញ​ បាន​រក្សា​ការ​សម្រេច​របស់​ គ.ជ.ប​ ទុក​ជា​បានការ​ដោយ​បិទ​ផ្លូវ​តវ៉ា។​ ការ​សម្រេច​បែប​នេះ ​បាន​ធ្វើ​ឲ្យ​សហគមន៍​អន្តរជាតិ​ចេញ​មក​ប្រតិកម្ម​ជា​បន្ត​បន្ទាប់​ ជា​ហេតុ​ធ្វើ​ឲ្យ​លោក​នាយក​រដ្ឋមន្រ្តី​ ហ៊ុន សែន​ ថា​បញ្ហា​នេះ​ ជា​ល្បិចកល​ថ្នាក់​ដឹក​នាំ​ណា​ម្នាក់​របស់​គណបក្ស​ភ្លើងទៀន​ ដែល​មិន​ចង់​ឲ្យ​គណបក្ស​នេះ​ចូលរួម​ការ​បោះឆ្នោត​ ក្នុង​ចេតនា​ដើម្បី​ឲ្យ​សហគមន៍​អន្តរជាតិ​ដាក់​សម្ពាធ​មក​លើ​កម្ពុជា។​