លោកនាយករដ្ឋមន្ត្រី ហ៊ុន សែន កាលពីថ្ងៃចន្ទម្សិលមិញ បានបញ្ជាទៅរដ្ឋមន្ត្រីក្រសួងការងារ និងរដ្ឋមន្ត្រីក្រសួងសេដ្ឋកិច្ច ឲ្យពិភាក្សាគ្នាជាមួយថៅកែរោងចក្រកាត់ដេរ ផលិតស្បែកជើង និងសម្ភារៈធ្វើដំណើរ ដើម្បីឧបត្ថម្ភសាច់ប្រាក់ដល់កម្មករ កម្មការិនីវិស័យនេះ ចំពោះរោងចក្រដែលបានព្យួរ។ តាមយោបល់លោក ហ៊ុន សែន កម្មករដែលបាត់បង់ការងារដោយរោងចក្រព្យួរនៅអំឡុងពេលនេះ នឹងត្រូវទទួលបានចាប់ពីខែមេសាខាងមុខនូវការឧបត្ថម្ភ ៧០ដុល្លារក្នុង១ខែ ក្នុងនោះរដ្ឋាភិបាលជួយ ៤០ដុល្លារ និង៣០ដុល្លារទៀតបានពីថៅកែរោងចក្រ។ ការលើកឡើងរបស់លោកនាយករដ្ឋមន្ត្រីដូច្នេះ គឺបន្ទាប់ពីរោងចក្រកាត់ដេរកាន់តែច្រើនទៅបានព្យួរការងារ។