នៅ​ថ្ងៃ​ពុធ ទី១៦ វិច្ឆិកា​នេះ គ្រប់​គ្នា​កំពុង​ផ្តោត​ចក្ខុ​លើ​ព្រឹត្តិការណ៍​ធ្លាក់​មីស៊ីល​លើ​ទឹកដី​ប្រទេស​ប៉ូឡូញ​នា​រសៀល​ថ្ងៃ​អង្គារ ទី១៥ វិច្ឆិកា​ដែល​បាន​បណ្តាល​ឲ្យ​ស្លាប់​ពលរដ្ឋ​ប៉ូឡូញ​ចំនួន​ពីរ​នាក់។ ព្រឹត្តិការណ៍​មួយ​នេះ​បាន​បង្ក​ឲ្យ​មាន​ការ​ភ្ញាក់ផ្អើល ភិតភ័យ និង​ការ​បញ្ចេញ​ប្រតិកម្ម​ជា​បន្តបន្ទាប់។ អ៊ុយក្រែន​បាន​ចង្អុល​មុខ​រុស្ស៊ី​ភ្លាម ហើយ​រុស្ស៊ី​ក៏​បាន​ចេញ​មុខ​បដិសេធ​ភ្លាម​ភ្លែត។ ចំណែក​ក្រុម​ប្រទេស​បស្ចិមលោក​នៅ​មិន​ទាន់​ហ៊ាន​សន្និដ្ឋាន​យ៉ាង​ម៉េច​ដោយ​រង់​ចាំ​លទ្ធផល​ស៊ើបអង្កេត​ស៊ីជម្រៅ។ អង្គការ​អូតង់​បាន​កោះ​ប្រជុំ​បន្ទាន់​ថ្នាក់​ឯកអគ្គរដ្ឋទូត​នា​ព្រឹក​ថ្ងៃ​ពុធ ទី១៦ វិច្ឆិកា​នេះ ព្រោះ​ប៉ូឡូញ​ជា​ប្រទេស​សមាជិក​ម្នាក់។