សង្រ្គាម​រុស្ស៊ី​ឈ្លានពាន​អ៊ុយក្រែន​ដែល​បាន​ចាប់​ផ្តើម​ក្នុង​ថ្ងៃទី២៤ កុម្ភៈ​កំពុង​ឈាន​ចូល​ក្នុង​ផ្លូវ​របត់​ថ្មី។ ក្រោយ​ពី​រុស្ស៊ី​បាន​ប្រកាស​ផ្តាច់​យក​តំបន់​ចំនួន ៤ របស់​អ៊ុយក្រែន​ជា​ផ្លូវការ​កាល​ពី​ថ្ងៃទី៣០ កញ្ញា​មក កងទ័ព​អ៊ុយក្រែន​បាន​បង្កើន​ការ​ប្រយុទ្ធ​ដោយ​មិន​បន្ធូរ​ដៃ​ដើម្បី​ដណ្តើម​យក​តំបន់​ទាំង​នោះ​ពី​កណ្តាប់ដៃ​រុស្ស៊ី​វិញ។ គេ​បាន​សង្កេត​ឃើញ​ថា​នា​រយៈ​ពេល​ប៉ុន្មាន​ថ្ងៃ​ចុង​ក្រោយ​នេះ កងទ័ព​អ៊ុយក្រែន​ដណ្តើម​បាន​ទីតាំង​មួយ​ចំនួន​នៅ​ក្នុង​តំបន់​ដែល​រុស្ស៊ី​ទើប​ផ្តាច់​យក។ ចំណែក​រុស្ស៊ី​ក៏​បាន​ទទួល​ស្គាល់​ពី​ការ​រុល​ទៅ​មុខ​របស់​ទ័ព​អ៊ុយក្រែន​នៅ​ក្នុង​តំបន់​ទាំង​នោះ​ដែរ។ តែ​រុស្ស៊ី​បាន​សន្យា​វាយ​យក​ត្រឡប់​វិញ។