ការផ្សងគោឧសភរាជតាមរយៈព្រះរាជពិធីច្រត់ព្រះនង្គ័លនៅឆ្នាំ២០២៥នេះ បានបង្ហាញថា ស្រូវ ពោត និងសណ្តែកឆ្នាំនេះទទួលបានផលល្អប្រសើរ។ នៅក្នុងចំណោមអាហារ៧មុខ គោឧសភរាជបានបរិភោគ មានស្រូវ៩៥% ពោត៩៥% និងសណ្តែក៨០%។ អ្នកជំនាញខាងប្រពៃណី វប្បធម៌ខ្មែរនានាកត់សម្គាល់ឃើញថា ពិធីផ្សងគោឧសភរាជតាមរយៈព្រះរាជពិធីច្រត់ព្រះនង្គ័លនេះមិនប្រាកដ ១០០ភាគរយទេ ធៀបនឹងស្ថានភាពជាក់ស្តែង។ តែទោះយ៉ាងណា ពិធីមួយនេះដែលមានតាំងពីបរមបុរាណមកគឺជាការសម្គាល់ថា រដូវធ្វើស្រែចម្ការបានឈានចូលមកដល់ហើយ។