ថ្ងៃចន្ទទី​៣០ឧសភា ប្រមុខដឹកនាំបណ្តាប្រទេសសហភាពអឺរ៉ុប នឹងបើកជំនួប​កំពូលវិសាមញ្ញមួយ ក្នុងក្របខណ្ឌក្រុមប្រឹក្សាអឺរ៉ុប ដើម្បី​និយាយគ្នាពី បញ្ហាសង្គ្រាម​នៅអ៊ុយក្រែន។ អឺរ៉ុបមានបំណងវាយសំពងឲ្យចំឆ្នាំងបាយ​របស់​រុស្ស៊ី តាមរយៈការហាមឃាត់ ឈប់ទិញប្រេងរបស់រុស្ស៊ីទាំងស្រុងតែម្តង។ តែយ៉ាងណាគម្រោងនេះ កំពុងស្ថិតនៅជាប់គាំង ដោយសារ​មានប្រទេសសមាជិកខ្លះជំទាស់ ជាក់ស្តែងដូចជា​ហុងគ្រី ដើលរំពឹងយ៉ាងខ្លាំងទៅលើប្រេងនាំចូលពីរុស្ស៊ី។ ក្រៅពី​បញ្ហាទណ្ឌកម្ម​លើរុស្ស៊ីនេះ ក្រុមប្រទេសអឺរ៉ុប ក៏ត្រូវស្វែងរកការឯកភាពគ្នាដែរ ដើម្បី​រៀបចំកសាងប្រព័ន្ធការពារសន្តិរួមគ្នា ក្រោមការផ្តួចផ្តើមគំនិត របស់​លោក​ប្រធានាធិបតីបារាំង អេម៉ានុយអែល ម៉ាក្រុង។