គិតត្រឹមពីរទសវត្សរ៍ចុងក្រោយនេះ បណ្ដាប្រទេសអឺរ៉ុបដែលភាគច្រើនជាសមាជិកសហភាពអឺរ៉ុបបានឆ្លងកាត់នូវវិបត្តិផ្សេងៗរួមគ្នា រាប់តាំងពីវិបត្តិហិរញ្ញវត្ថុកាលពីឆ្នាំ២០០៨ វិបត្តិបំណុលក្នុងប្រទេសក្រិក វិបត្តិតំបន់ចាយប្រាក់អឺរ៉ូ វិបត្តិជំងឺកូវីដ១៩ និងចុងក្រោយ គឺវិបត្តិសង្គ្រាមឈ្លានពានរបស់រុស្ស៊ីលើប្រទេសអ៊ុយក្រែន ហើយនិងវិបត្តិថាមពល។ ម្ដងជាពីរដង វិបត្តិនានាបានធ្វើឱ្យអឺរ៉ុបបែកបាក់ខ្លះ ហើយក៏រួបរួមគ្នាខ្លះ។ ទោះជាយ៉ាងណា មកដល់ពេលនេះ អឺរ៉ុបនៅបន្ដធ្វើដំណើរទៅមុខជាមួយគ្នា។