ក្រសួង​អប់រំ​ បាន​កំណត់​ឱ្យ​គ្រឹះស្ថាន​បឋមសិក្សា ​រហូត​ដល់​គ្រឹះស្ថាន​មធ្យម​សិក្សា​ចំណេះ​ទូទៅ​ទាំង​រដ្ឋ​ និង​ឯកជន​ ត្រូវ​អនុវត្ត​វិស្សមកាល​ធំ​រយៈ​ពេល​១ខែ​ដើម្បី​ចូល​រួម​រក្សា​សណ្តាប់​ធ្នាប់​ សុវត្ថិភាព​ និង​គាំទ្រ​ដល់​ព្រឹតិ្តការណ៍​ស៊ីហ្គេម​ដែល​កម្ពុជា​ធ្វើ​ជា​ម្ចាស់​ផ្ទះ​។ ​វិស្សមកាល​ធំ​ក្នុង​ឆ្នាំ​នេះ ​គឺ​ចាប់​ផ្តើម​ពី​ថ្ងៃ​ទី២០​ ខែ​មេសា ​ឆ្នាំ២០២៣​ រហូត​ដល់​ថ្ងៃទី១៨​ ខែឧសភា ​ឆ្នាំ២០២៣ ​ខណៈ​ព្រឹិត្តិការណ៍​ស៊ីហ្គេម ​លើក​ទី៣២​ និង​អាស៊ាន​ប៉ារ៉ាហ្គេម​លើក​ទី១២​ នឹង​ប្រព្រឹត្ត​ទៅ​នៅ​ថ្ងៃ​ទី០៥​ ខែ​ឧសភា​ រហូត​ដល់​ថ្ងៃ​ទី១៧ ​ខែឧសភា​ ឆ្នាំ២០២៣។​ ជុំវិញ​វិស្សមកាល​ធំ​នា​ពេល​នេះ ​អ្នក​តាម​ដាន​សង្គម​មាន​មតិ​ផ្ទុយ​គ្នា​ជុំវិញ​ទៅ​នឹង​ផល​ប៉ះពាល់​ដែល​នឹង​អាច​កើត​មាន​ឡើង​ចំពោះ​ការ​សិក្សា​របស់​សិស្សានុសិស្ស។​ តែ​យ៉ាង​ណា ​ពួក​គេ​យល់​ថា ​ដើម្បី​អាច​ឱ្យ​សិស្ស​រៀន​ក្នុង​អំឡុង​ព្រឹត្តិការណ៍​ស៊ីហ្គេម​បាន​ ទាំង​គ្រឹះស្ថាន​សិក្សា​រដ្ឋ​ និង​ឯកជន​ត្រូវ​បង្រៀន​តាម​ប្រព័ន្ធ​អនឡាញ​ជំនួស​វិញ។​