មន្ទីរបញ្ចកោណសហរដ្ឋអាមេរិកបានប្រកាសពីដំណើរទស្សនកិច្ចផ្លូវការរបស់រដ្ឋមន្ដ្រីការពារជាតិ លោកLloyd Austin មកកម្ពុជា នៅថ្ងៃទី៤ ខែមិថុនា ឆ្នាំ២០២៤។ អ្នកនាំពាក្យស្ថានទូតអាមេរិកប្រចាំកម្ពុជា ប្រាប់វិទ្យុ​បារាំង​អន្តរជាតិRFIថា លោក Lloyd Austin នឹងជួបពិភាក្សាការងារជាមួយមេដឹកនាំថ្មីរបស់កម្ពុជា លោក ហ៊ុន ម៉ាណែត ពីបញ្ហាសន្ដិសុខ  និងការពារជាតិ។ លោក Lloyd Austin ធ្លាប់មកកម្ពុជាកាលពីខែវិច្ឆិកា ឆ្នាំ២០២២ ក្នុងពេលកម្ពុជាធ្វើជាម្ចាស់ផ្ទះកិច្ចប្រជុំរដ្ឋមន្ដ្រីការពារជាតិអាស៊ានបូក។ តែដំណើរទស្សនកិច្ចផ្លូវការនៅពេលនេះ គឺធ្វើឡើង ខណៈកម្ពុជា និងចិន កំពុងធ្វើសមយុទ្ធយោធារួមគ្នា។  ការណ៍នេះនាំឱ្យមានសំណួរថា តើទស្សនកិច្ចរបស់ប្រមុខការពារជាតិអាមេរិក ជាការព្រួយបារម្ភពីឥទ្ធិពលចិនលើកម្ពុជាឬយ៉ាងណា?