នៅ​ក្នុង​ប្រទេស​បារាំង ប្រធានាធិបតី​លោក​ម៉ាក្រុង​បាន​ជួប​សន្ទនា​តាម​អនឡាញ​ជាមួយ​នាយករដ្ឋមន្រ្តី​អាល្លឺម៉ង់​លោក​អូឡាហ្វ ស្ហុលស៍​នា​ថ្ងៃ​ចន្ទ ទី៥ កញ្ញា។ នៅ​ក្រោយ​ជំនួប លោក​ម៉ាក្រុង​បាន​ធ្វើ​សន្និសីទកាសែត​មួយ​ដែល​ផ្តោត​សឹង​ទាំង​ស្រុង​លើ​វិបត្តិ​ថាមពល។ គឺ​ជា​វិបត្តិ​មួយ​ដែល​កើត​ចេញ​ពី​សង្រ្គាម​រុស្ស៊ី​ឈ្លានពាន​អ៊ុយក្រែន និង​ដែល​កំពុង​ធ្វើ​ឲ្យ​អឺរ៉ុប​រង​ផលវិបាក​យ៉ាង​ខ្លាំង។ នៅ​ក្នុង​ន័យ​នេះ លោក​ម៉ាក្រុង​បាន​ប្រកាស​ឲ្យ​មាន​សាមគ្គីភាព​អឺរ៉ុប​ដោយ​ផ្តោត​លើ​ការ​ដោះដូរ​រវាង​ឧស្ម័ន និង​ភ្លើងអគ្គិសនី។ ទន្ទឹម​គ្នា​នេះ លោក​ម៉ាក្រុង​បាន​ជំរុញ​ឲ្យ​ពលរដ្ឋ​បារាំង​ប្រើ​ភ្លើងអគ្គិសនី​ដោយ​សន្សំសំចៃ។